Túrkistan oblysynda aǵyn sý máselesi birtindep sheshimin taýyp keledi

TÚRKІSTAN. QazAqparat – Túrkistan oblysynda aǵyn sý tapshylyǵyn joıyp, sýarmaly jerlerdiń tıimdiligin arttyrý máselesi birtindep sheshilýde. Óńirde aǵyn sý kólemin únemdeý baǵytynda aýqymdy jobalar qolǵa alynǵan, dep habarlaıdy QazAqparat tilshisi.

Oblys ákimi Ómirzaq Shókeev aımaqty aralap, jergilikti sharýalarmen kezdesti.

Aıta keteıik, búginde Túrkistan qalasy aýmaǵyndaǵy qýraǵan jáne bos jatqan jerlerge aǵyn sý kele bastaǵan.

«Túrkistan oblysynyń áleýmettik-ekonomıkalyq damytýdyń 2024 jylǵa deıingi keshendi jospary» aıasynda birqatar jumystar bastalyp, sorlanǵan jáne sýsyz jatqan jerlerdiń bederin jańartý úshin respýblıkalyq 2 joba iske qosylǵan. Syıymdylyǵy 18 mln tekshe metr bolatyn «Keńsaı Qosqorǵan-2 sý qoımasyn salý» jobasyna 2 mlrd teńge qaralyp, jumys qarqyndy túrde bastalǵan. Jańa joba quny – 5,9 mlrd teńge.

Sonymen qatar, Túrkistan magıstraldy arnasyn kúrdeli jóndeý jobasyna 4 mlrd teńge kózdelip, búginde 9,6 shaqyrym kanal betondalǵan. Aımaq basshysy Ómirzaq Shókeevtiń tikeleı tapsyrmasymen jergilikti bıýdjet esebinen 134 tik drenajdy uńǵymanyń jumysyn qalpyna keltirý qolǵa alyndy. Atalǵan jobanyń quny – 2,6 mlrd teńge.

Ázirge Túrkistan aýmaǵynda 40 tik drenajdy uńǵyma qalpyna keltirilip, agrosaladaǵylardyń alańyn kóbeıtýge mán berilgen. Sondaı-aq, egis alqaptaryn sýlandyrý máselesi sheshilip keledi.

Sala mamandarynyń sózinshe, tik drenajdar men kollektorlyq júıeler tolyqtaı qalpyna kelgen jaǵdaıda jerdiń tuzdaný máselesi sheshiledi. Al, topyraq qunary birneshe ese artady. Atqarylyp jatqan jumystardyń barysymen tanysqan aımaq basshysy jergilikti turǵyndarmen júzesip, jaýapty basshylarǵa tıisti nusqaý berdi.

Eske salaıyq, óńirde «Jumyspen qamtýdyń jol kartasy» jáne «Shoshqakól kólder júıesin damytý» jobasy taıaý kúnderi júzege asa bastaıdy. Odan bólek, «Syrdarııa ózeninen mashınaly ádispen sý berý jobasy» qolǵa alynyp, tehnıkalyq-ekonomıkalyq negizdemesi men jobalyq qujattary ázirlenýde.

Atalǵan jobalar arqasynda Túrkistan qalasy jalpy 196 mln tekshe metr aǵyn sýmen qosymsha qamtylmaq. Sondaı-aq, jergilikti bıýdjet esebinen 16 nysanda jóndeý jumystary júrip jatyr. Nátıjesinde 9,5 myń ga alqaptyń sýarý qabileti jaqsarady dep josparlanǵan.