Túrkistan oblysynda 99 jastaǵy soǵys ardagerine páter kilti tabystaldy

TÚRKІSTAN. QazAqparat – Túrkistan oblysy Tólebı aýdanynda Ekinshi dúnıejúzilik soǵystyń ardagerine páter kilti tabystaldy. Ardager Rysmet Jumaǵulovqa Leńgir qalasynan 2 bólmeli úıdiń kilti tapsyryldy, dep habarlaıdy QazAqparat tilshisi.

Páter kiltin saltanatty túrde tabystaý rásimine oblys ákiminiń orynbasary Joldymurat Amanbaev pen aýdan ákimi Baýyrjan Omarbekov, aýdandyq ardagerler keńesiniń tóraǵasy Átirhan Shyńǵysbaev qatysty. Olar maıdangerdi jańa baspanasymen quttyqtap, arnaıy syılyqtardy tabystady.

Aıta keteıik, 99 jastaǵy ardager buǵan deıin Leńgir qalasyndaǵy jeke úıde turǵan. Oǵan bıylǵy jyly bolatyn Jeńistiń 75 jyldyǵyna oraı jáne de baspana kezeginiń kelýine baılanysty jańa páterdiń kilti berildi. Tórt ul men bes qyzdy tárbıelep ósirgen aqsaqal baspanaly bolyp, zor qýanyshqa keneldi.

Jalpy óńirde soǵys ardagerlerine degen memlekettiń qamqorlyǵy eshqashan tolastamaǵan. Únemi baspana berilip, túrli syı syıapattar tapsyrylyp otyrady.