Túrkistan oblysynda 863 jas maman aýyldyq jerlerge jumysqa ornalasty

TÚRKІSTAN. QazAqparat - Túrkistan oblysy «Dıplommen aýylǵa» baǵdarlamasyn júzege asyrýda kósh bastap tur. Ótken jyly óńirde 700-ge jýyq jas maman aýyldyq jerlerge baryp, jumysqa ornalasqan. Bıyl qyzmetke kirisken 863 mamannyń 314-i baspanaly boldy, dep habarlaıdy QazAqparat Habar 24 agenttigine silteme jasap.

Kentaý aýdanynda da osy joba aıasynda jumysqa turyp, tirshiligin túzegen jastar az emes. Sonymen qatar, aýdandaǵy jastar ortalyǵy da jastarǵa baǵyt-baǵdar berip otyrady. Bul - Baıyldyr aýyldyq okrýginiń mádenıet úıi. Klýb meńgerýshisi Gúlnur Dúısenbıeva aýyl balalaryna sahnada óner kórsetýdiń qyr-syryn úıretip jatyr. Jas maman -  Otyrar aýdanynyń týmasy. Túrkistandaǵy Qoja Ahmet ıAsaýı atyndaǵy halyqaralyq qazaq-túrik ýnıversıtetin akterlik óner mamandyǵy boıynsha bitirgen. Joldasy ekeýi «Dıplommen aýylǵa» baǵdarlamasymen osynda kelip jumysqa ornalasypty. Qazir eki balanyń anasy óz jumysyna dán rıza.

«Qudaıǵa shúkir, baspanam bar, jumysym bar. Aýyldaǵy jas búldirshinderge sabaq beremin. Ózime osy jumysym unaıdy. Osy baǵdarlamanyń shyqqanyna úlken raqmet aıtamyn. Jastarǵa aıtarym, qoldaryna dıplomdaryn alsa, men sııaqty aýylǵa kelip jumys istesin, men sııaqty baspanaly bolsyn», - deıdi Baıyldyr aýyldyq okrýginiń turǵyny Gúlnur Dúısenbıeva.

Búginde Kentaý qalalyq Jastar ortalyǵy jastardyń jıi bas qosatyn ornyna aınalǵan. Munda Elbasynyń «Tsıfrly Qazaqstan» baǵdarlamasyn jastarǵa keńinen nasıhattaý maqsatynda «elektrondy úkimet» júıesi engizilgen. Jastar ózderine qajetti barlyq aqparatty osy jerden kelip alady.  

Jalpy, ortalyqta jastarǵa qyzmet kórsetý úshin barlyq jaǵdaı jasalǵan. Máselen, belgili kásipkerlerdiń qatysýymen jastardy kásipkerlikke baýlyp, kepilsiz nesıe berýge baǵyttalǵan túrli semınar-trenıngter ótip turady. Sonymen qatar jastardy soltústikke qonys aýdaryp, sonda qalyp jumys isteýge nasıhattaıtyn bos jumys oryndarynyń jármeńkesi uıymdastyrylady. 

«Búgingi tańda jastarǵa ne qajet? Ol - jastar arasynda quqyq buzýshylyq pen qylmystyń aldyn alý maqsatynda bos ýaqytyn qalaı ótkizedi, soǵan jastardy beıimdeý. Ekinshisi, bizdiń memlekettik baǵdarlamamyz bar, ıaǵnı jastar kóbine turǵyn úı, qoljetimdi baspana, «Dıplommen aýylǵa», «Serpin» baǵdarlamasyna qatysty keńes beremiz. Toǵyzqumalaq úıirmeleri, ulttyq qundylyqtar, ulttyq oıyndarymyzdy qaıta jańǵyrtý maqsatynda túrli úıirmeler jumys isteıdi», - deıdi Kentaý qalalyq jastar ortalyǵynyń jetekshisi Qanat Bekmetov.

Sondaı-aq, aldaǵy 2019 jyl - Jastar jyly bolǵandyqtan, olardy jumyspen qamtyp, sapaly bilim alýyna baǵyttalǵan keshendi jumys jospary bekitilgen. Qala ákiminiń qoldaýymen sport alańdary da ashylǵan.

Jalpy, Túrkistan oblysynda bes júz myńnan asa jas bar. Bul - oblys halqynyń 26 paıyzy. «Serpin-2050» jobasy aıasynda 1 589 jas soltústik óńirlerde bilim alyp jatyr.