Túrkistan oblysynda 68 júkti áıel «Pfizer» vaktsınasyn qabyldady

TÚRKІSTAN.QazAqparat - Búgin Túrkistan oblysynda oqýshylar men júkti áıelderge koronavırýsqa qarsy «Pfizer» vaktsınasyn salý bastaldy, dep habarlaıdy QazAqparat tilshisi.

Dárigerler turǵyndardy medıtsınalyq tekserýden ótkizip, qarsy kórsetilimderi bolmaǵan jaǵdaıda ekpe egip jatyr.

Mekemelerde profılaktıkalyq jumystardy júrgizý úshin barlyq jaǵdaı jasalǵan. Ekpe egetin medıtsına mamandary arnaıy oqytýdan ótken.

«Pfizer» ekpesi 12-den 18 jasqa deıingi jasóspirimderge, júkti áıelder men laktatsııa kezeńindegi áıelderge erikti túrde salynady. Profılaktıkalyq ekpe azamattardyń óz kelisimimen ǵana júrgiziledi. Jasóspirimderdi vaktsınatsııalaý – tek ata-anasynyń nemese zańdy ókiliniń kelisimimen júzege asady.

Aıta keteıik, Túrkistan oblysyna «Pfizer» vaktsınasynyń 29 250 dana mólsherindegi alǵashqy partııasy jetkizilgen bolatyn.