Túrkistan oblysynda 637 adam vaktsına saldyrýdan bas tartqan
Túrkistan oblysynda ımmýndaý aptalyǵy bastaldy. Halyqty jappaı vaktsınatsııalaý sharasynyń basty maqsaty – myńdaǵan adamdy kóptegen epıdemıologııalyq aýrýlardan saqtaýǵa baǵyttalǵan. 23-29 sáýir aralyǵynda júrgiziletin ımmýndaý jumystarynyń barysynda túrli aýrýlarǵa qarsy egýler júrgiziledi.
«Polıomıelıt derti álem elderiniń basym bóliginde joıylsa, dıfterııa, sirespe aýrýlary birli-jarym deńgeıde tómendep otyr. Mysaly, qyzylshaǵa qarsy vaktsınatsııanyń arqasynda 2000-2016 jyldary álemde ólim-jitim sany 84%-ǵa azaıǵan. Dúnıejúzilik ımmýndaý aptasyna 180-nen astam el qatysyp, jyl saıyn ár túrli devızdermen ótkiziledi. Ókinishke qaraı, qoǵamda ár túrli epıdemııalyq aýrýlarǵa qarsy salynatyn ekpeden bas tartýshylar sany áli de kóp», - dedi Túrkistan oblysy sanıtarııalyq-epıdemıologııalyq baqylaý departamenti basshysynyń orynbasary Bahtyoraz Elemesov.
Al, Túrkistan oblysy densaýlyq saqtaý basqarmasy basshysynyń orynbasary Saltanat Jabaǵıeva óńir boıynsha 637 adam vaktsına saldyrýdan bas tartqanyn aıtty. Ekpeden bas tartýshylardyń edáýir bóligi – 15 jasqa deıingiler.
«Taldaýlar nátıjesiniń basym kópshiligi dinı kózqarastaǵy jáne jeke nanymdaǵy azamattar ekenin kórsetip otyr. Ekpeden bas tartqandar arasynda saýalnama da júrgizildi. Basym bóligi ınternet jelilerinde avtory belgisiz, vaktsına týraly teris pikir qalyptastyrýǵa arnalǵan vıdeolarǵa senedi, keıbiri alyp-qashpa áńgimelerdiń áseri bolǵanyn alǵa tartty. Ýaqtyly ári tıisti kontıngenttiń vaktsına alýy ujymdyq ımmýnıtettiń qalyptasýyna, juqpaly aýrýlardyń jeńil ótýine úlken septigin tıgizedi. Vaktsınatsııa azamattardyń turǵylyqty jeri boıynsha emhanalarda tegin júrgiziledi», - dedi Saltanat Jabaǵıeva.
Búginde sanıtarııalyq-epıdemıologııalyq baqylaý qyzmetiniń mamandary ekpeden bas tartýshylarmen túsindirme jumystaryn júrgizip jatyr. Ázirge 26 azamat ózderiniń aldyńǵy oılarynan aınyp, ekpe saldyrýǵa kelisim bergen.