Túrkistan oblysynda 54 jastaǵy áıel ul týdy, sábıdiń ákesi – zeınetker

TÚRKІSTAN. QazAqparat – Túrkistan oblysy Ordabasy aýdanynda 54 jastaǵy áıel bosandy. Jańa týǵan náresteniń ákesi Sársen Qoshanuly 64 jasta, dep habarlaıdy QazAparat tilshisi.

Ordabasy aýdandyq aýrýhanasynyń perzenthana bóliminde bosanǵan Sándigúl Úsenbekova jasandy jolmen júkti bolǵan. 15 naýryz kúni ol ota jolymen dúnıege ul bala ákeldi. Náresteniń salmaǵy – 4 510 gr. Qazirgi tańda ana men balanyń jaǵdaıy jaqsy. Aýyldyq aýrýhanada dáriger bolyp qyzmet atqaratyn áıel jas kelgende bosanýdyń ońaı emes ekenin aıtady.

«Ózimniń qyzmetim dáriger bolǵandyqtan, jaqsylap kútindim. Sondyqtan, qıyndyqtar týyndamady. Ákesi menen 10 jas úlken. Qazir júgirip júrip, qujattaryn jasatyp jatyr. Qýanyshynda shek joq. 73-tegi anam da meni perzenthanadan shyǵaryp alýǵa kele jatyr. Tuńǵyshym – qyz bala», - deıdi Sándigúl Úsenbekova.

Bul – otbasyndaǵy ekinshi sábı. Kesh turmys qurǵan ana tuńǵysh qyzyn osydan úsh jyl buryn, ıaǵnı 51 jasynda bosanǵan. Sábıin baýyryna basqan ananyń qýanyshynda shek joq. Dárigerlerge alǵysy zor.

Búgin zeınet jasyndaǵy áke perzentin alyp ketýge keldi. Sársen Qoshanuly da shekesi torsyqtaı ul tapqan jaryna dán rıza. Náresteniń esimin Nurmuhammed dep qoıypty.

«64 jasta uldy boldym. Mynaý qyzymdy 61 jasymda kórdim. Budan da úlken balalarym bar. Joǵary oqý ornynda oqıdy. Bir qyzym turmysta. Jıenderim bar. Perzentim osymen jeteý boldy», - deıdi Sársen Qoshanuly.