Túrkistan oblysynda 50 sheteldik el aýmaǵynan shyǵaryldy
04:20, 17 Sáýir 2023
TÚRKІSTAN. QazAqparat – Túrkistan oblysynda 50 sheteldik el aýmaǵynan shyǵaryldy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
Túrkistan oblysy Polıtsııa departamentiniń bastyǵy Murat Qabdenov óńirdegi zańsyz kóshi-qon arnasyn anyqtap, aldyn alý jáne olardy uıymdastyrýshylardy tabý, sondaı-aq oblys aýmaǵynda júrgen sheteldikter men azamattyǵy joq adamdardy anyqtaý maqsatynda tikeleı tapsyrma berip, arnaıy top qurdy.
Atalǵan top 10 táýlik ishinde el aýmaǵynda zańsyz júrgen Ózbekstan Respýblıkasynyń 114 azamatyn anyqtaǵan. Olarǵa qatysty QR ÁQBtK-niń 517-baby boıynsha tıisti hattamalar toltyrylyp, jınaqtalǵan is-qujattar jergilikti sotqa joldandy. Qazaqstan Respýblıkasynda bolý erejelerin buzǵan 50 sheteldik sot sheshimimen el aýmaǵynan alastatylsa, 4 sheteldik ákimshilik qamaýǵa alyndy.
Sondaı-aq, sheteldik jumys kúshin zańsyz paıdalanǵan Qazaqstan Respýblıkasynyń 2 azamatynyń árqaısysyna QR ÁQBtK-niń 519-baby boıynsha ákimshilik aıyppul salyndy. Sheteldikterdi zańda belgilengen tártip boıynsha qabyldamaǵan 3 qazaqstandyqqa qatysty QR ÁQBtK-niń 518-baby boıynsha shara qabyldandy.