Túrkistan oblysynda 50-ge jýyq qyzmetker revaktsınatsııalaýdan ótti

TÚRKІSTAN. QazAqparat - Túrkistan oblysynda qaıta ekpe egý naýqany bastaldy. Vaktsınany buǵan deıin saldyrǵan 47 dáriger otandyq «QazVac» ekpesin qaıta qabyldady, dep habarlaıdy QazAqparat tilshisi.

Oblystyq Qoǵamdyq densaýlyq basqarmasynyń málimetinshe, koronavırýs ınfektsııasymen kúreste aldyńǵy shepte júrgen aq jeleńdiler úshin COVID-19 ınfektsııasynan qorǵaný mańyzdy bolyp sanaldy. Revaktsınatsııa bir ǵana dozamen júrgiziledi. Sonymen qatar aldynda «HayatVax», «QazVac», «CoronaVac», «Sınofarm» vaktsınalaryn saldyrǵandar araǵa 6 aı ýaqyt ótkende jáne «Spýtnık V» vaktsınasyn saldyrǵandar arada 9 aı ýaqyt ótken soń vaktsınanyń kez kelgen basqa túrin qabyldaýlaryna bolady. Sala mamandary sondaı-aq, revaktsınatsııa 60 jastan asqan adamdarǵa da júrgiziletinin aıtady.

Aıta keteıik, aımaqta vaktsına qabyldaýǵa jatatyn azamattardyń 97 paıyzy alǵashqy komponentin, 92 paıyzy ekinshi komponentin qabyldaǵan.