Túrkistan oblysynda 5 jasar bala terezeden qulap, mert boldy
17:27, 09 Maýsym 2023
TÚRKІSTAN. QazAqparat – Túrkistan oblysynda 5 jasar bala kópqabatty úıdiń terezesinen qulap, qaza boldy, dep habarlaıdy QazAqparat tilshisi.
Oqıǵa Sozaq aýdany, Taýkent kentinde boldy. Eresekterdiń qaraýynsyz qalǵan 2018 jyly týǵan búldirshin 5-shi qabattan qulap ketken. Balanyń ata-anasy jumysta bolǵandyqtan, úıinde 8 jastaǵy ápkesi qarap otyrǵan. Oqıǵa ornyna Tótenshe jaǵdaılar departamentiniń bir qyzmetkeri men bir tehnıkasy bardy.
«Balalardy qaraýsyz nemese qarııalar men balalardyń baqylaýynda qaldyrmańyz, terezelerdi, balkondardy ashyq tastamańyz. Balańyzǵa terezelerdiń qalaı ashylatynyn kórsetpeńiz. Terezege bekitkishter ornatý kerektigin eskertemiz!» - delingen Túrkistan oblystyq Tótenshe jaǵdaılar departamentiniń baspasóz qyzmeti taratqan habarlamada.