Túrkistan oblysynda 41 adam sýǵa ketken, onyń 80 paıyzy - balalar
Sala mamandarynyń sózine súıensek, sýdaǵy qaıǵyly jaǵdaılardyń basty sebepteri - halyqtyń jáne balalardyń sýdaǵy qaýipsizdikti jete túsinbeýi.
Bul baǵytta tótenshe jaǵdaı departamentiniń qyzmetkerleri arnaıy monıtorıng júrgizgen.
Nátıjesinde sýǵa batý oqıǵalary negizinen eldimeken ishinen jáne eldimekenge jaqyn ótetin betondalǵan kanaldarda bolatyny anyqtalǵan.
«Bul másele oblys ákimdiginiń jiti baqylaýyna alynyp, betondalǵan kanaldarǵa, araqashyqtyǵy 500 metrdi quraıtyn qaýipsizdik baspaldaqtaryn jáne baspaldaqtardyń tusyna 4 metrden qutqarý arqandary ornatylyp jatyr. Sondaı-aq, 16 azamatty qoǵamdyq qutqarý beketterine oqytý júrgizildi», - deıdi Túrkistan oblysy TJD Azamattyq qorǵanys basqarmasy bastyǵynyń mindetin ýaqytsha atqarýshy Orazbaı Aıtqulov.
Oblys aýmaǵynda sýǵa túsýge ruqsat etilmegen oryndarda departamentpen jáne aýdandyq, qalalyq ákimdiktermen birlesip tıisti is-sharalar uıymdastyrylyp jatyr.
Tótenshe jaǵdaı bólimderi men basqarmalary tarapynan 2624 qyzmetker tartyla otyryp, 1172 reıd júrgizilgen.
Nátıjesinde quzyrly organdar arqyly 141 jeke tulǵaǵa 1 725 000 teńge aıyppul salyndy.
Adamdardyń sýǵa ketýiniń aldyn alý jáne boldyrmaý maqsatynda jumyspen qamtý ortalyqtary arqyly 43 adam jumysqa qabyldanyp, daıarlyqtan ótti.
Bul azamattar sýdaǵy jáne órt qaýipsizdigi boıynsha jumys istep jatyr.
Sonymen qatar, arnaıy jáne resmı halyq shomylatyn oryn joq eldimekenderde modýldi-karkasty basseınder satyp alynyp, tegin jáne qaýipsiz shomylýǵa múmkindik jasalyp jatyr.
Tek búgingi kúnge deıin jeke kásipkerlerdiń qoldaýymen óńirde 15 karkasty basseın satyp alynyp, aýyl ákimdikteri arqyly ornatylǵan.
Sondaı-aq, 790 bala júzýdi úırengen.
Aıta keteıik, budan aldyn Túrkistan oblysynda bir kúnniń ishinde 4 balanyń sýǵa ketip, qaıtys bolǵanyn jazǵan bolatynbyz.