Túrkistan oblysynda 36 azamat «qyzyl» statýspen qoǵamdyq oryndarǵa barǵan

TÚRKІSTAN. QazAqparat - Túrkistan oblysynda barlyǵy 2122 azamat úı karantınine jatqyzylǵan. 23 mamyr men 28 shilde aralyǵynda 258 azamattyń «qyzyl», «sary» mártebesi bola tura oqshaýlaý rejımin buzǵandyǵy Ashyq jobasy arqyly belgili boldy, dep habarlaıdy QazAqparat tilshisi.

Onyń ishinde 36 azamattyń - «qyzyl», 110 azamattyń «sary» statýsy bolǵan. Іndettiń taralý qaýpin týdyrǵandardyń deni qoǵamdyq tamaqtaný oryndaryna, Halyqqa qyzmet kórsetý ortalyqtary men qonaq úı, saýda úılerine kirmek bolǵan. Alaıda Ashyq jobasy arqyly áreketterine tosqaýyl qoıyldy. ​​​​​Belgili bolǵandaı, naýqastardyń keıbiri tipti, birneshe nysanǵa barǵan.

Karantın rejımin buzǵandarǵa QR ÁQBtK-niń 425-baby boıynsha 19-na 30 AEK aıyppul salyndy. ​​​​Al koronavırýspen aýyrǵan adamdarmen qarym-qatynasta bolǵan «sary» mártebesi bar tulǵalardyń barlyǵyna qaýlylar shyǵaryldy.

Aıta keteıik, óńirde Ashyq jobasy sáýir aıynan bastap júzege asyryla bastady. Búgingi tańda 3116 nysan júıeni paıdalanady. Kásipkerlik palatasyna Ashyq jobasyn engizý úshin taǵy 3374 ótinish berilgen.​​​​​​ Bas sanıtarlyq dárigerdiń qaýlysyna sáıkes talaptardy oryndamaǵan, ıaǵnı kelýshilerdiń QR-kodty (check-in) skanerlemeýin qadaǵalamaǵan, 177 nysan jobadan shyǵaryldy.​​​