Túrkistan oblysynda 300-ge tarta jumysshynyń jalaqy qaryzy óteldi

TÚLKІBAS. QazAqparat - Túrkistan oblysy, Túlkibas aýdanynda 300-ge tarta jumysshynyń jalaqy qaryzy óteldi. Jumys berýshi kompanııaǵa Eńbek zańnamasyn buzǵany úshin usynys berilip, 744 myń teńge aıyppul tóleý boıynsha ákimshilik jaýapkershilikke tartylǵan, dep habarlaıdy QazAqparat tilshisi.

Aýdandyq prokýratýranyń málimetinshe, qomaqty qaryz «EVRASCON» Eýro-Azııalyq qurylys korporatsııasy» AAQ Qyzylorda fılıalynda qordalanǵan. 300 jumysshyǵa bereshektiń kólemi 63,5 mln teńgege jetken. Bul keleńsizdikter monıtorıng barysynda, fılıal jumyskerlerimen suhbattasý kezinde anyqtalǵan. Prokýrorlardyń sózinshe, tekseris kezinde azamattardyń basqa da birqatar eńbek quqyqtarynyń buzylǵany belgili bolǵan.

«Qadaǵalaý aktisi negizinde eńbek ınspektsııasy tekserý júrgizip, jalaqynyń ýaqtyly tólenbegenin, jumys ýaqytynyń qalypty uzaqtyǵy saqtalmaǵanyn anyqtady. Jekelegen jumyskerlermen eńbek sharty jasalmaǵan, arnaıy kıimmen qamtamasyz etilmegen, qaýipti jaǵdaıdaǵy jumystar úshin tólem durys júrgizilmegeni rastaldy. Búgingi kúni eńbekaqy boıynsha bereshek tolyq óteldi» delingen habarlamada.

Qadaǵalaý organynyń ókilderi atalǵan kásiporyn tarapynan zańbuzýshylyqtar birneshe ret qaıtalanǵanyn aıtady. Máselen, ótken jyly 350 jumysshyǵa 41 mln teńgege jalaqy bereshegi ótelgen bolatyn.