Túrkistan oblysynda 3 mln ga jaıylymdyq jer tapshylyǵy anyqtaldy

TÚRKІSTAN. QazAqparat – Túrkistan oblysynda jaıylymdyq jerlerdiń tapshylyǵyna taldaý júrgizilip, 3 mln 119 myń ga qajettilik anyqtalǵan. Bul týraly oblys ákimi Ómirzaq Shókeev ortalyq kommýnıkatsııalar qyzmetinde ótip jatqan brıfıng barysynda baıandap ótti, dep habarlaıdy QazAqparat tilshisi.

Aımaq basshysynyń aıtýynsha, ótken jyly 133 eldi mekenge 135,8 myń ga jer ortaq jaıylymǵa bekitilip berilgen.

«Bıyl eki baǵyt boıynsha qosymsha 1 012 myń gektarǵa ulǵaıtý josparlanyp, jyl sońyna deıin ortaq jaıylym aýmaǵyn 1 760 myńǵa jetkizý kózdelip otyr. Birinshi baǵyt boıynsha maqsatyna saı paıdalanylmaǵan jaıylym jerlerin memleket menshigine qaıtarý jolymen 405,2 myń ga, ekinshi baǵyt boıynsha iri jer paıdalanýshylarmen memorandým arqyly 606,8 myń ga qaıtarý josparlandy. Qazirgi tańda 14 myń ga jaıylym jeri memleket menshigine qaıtarylyp, 85,1 myń ga qatysty memorandým túzildi», - dedi Ómirzaq Shókeev.

Óńir basshysy bul jumystardyń nátıjesinde 112 aýyldyq okrýg turǵyndary ortaq jaıylymmen qamtamasyz etiletinin aıtady. Jalpy, oblystyń 2025 jylǵa deıingi josparyna sáıkes kezeń-kezeńimen ortaq jaıylymdy 2 896,2 myń gektarǵa ulǵaıtý josparlanǵan.