Túrkistan oblysynda 3,6 mlrd teńgeniń jobasy maquldandy
Búginde Túrkistan oblysy maquldanǵan jobalar kórsetkishi boıynsha elimizde kósh bastap tur. Biraq áli de máseleler kóp. Jumysty shıratyp, aýyl turǵyndaryn kásipkerlikke tartý kerek. Bul túıtkil boıynsha arnaıy májilis ótkizildi. Jıynda Túrkistan oblysynyń ákimi Darhan Satybaldy jaýaptylarǵa jumysty jandandyrýdy tapsyrdy. Jobany júzege asyrýda kemshilikke boı aldyrǵan ákimder men mekeme basshylaryn synǵa alyp, esebin tyńdady.
«Aýyl amanaty» boıynsha jobalardy qarjylandyrý kórsetkishi tómen. Ýaqyt ótip jatyr. Josparǵa engizilgen barlyq aýylda jobalar tolyq júzege asyp, eldiń tabysy artýy tıis. Jaýapty basqarma basshylary, sizder aýyl sharýashylyǵyndaǵy problemalardy anyqtap, sheshý joldaryn usynyńyzdar. Turǵyndarǵa ıdeıalar berip, jobany júzege asyrýǵa, óz kásibin bastaýǵa kómektesińizder. Belsendi turǵyndar ózderi izdenip, nesıesin alady. Biraq turǵyndardyń bári ondaı belsendi emes. Olarǵa túsindirý jumystaryn júrgizip, keńes bergen jón. Aýdan, qala ákimderi, bylaı otyra berýge bolmaıdy. Іzdenińizder, «Aýyl amanaty» jobasyn jandandyrý kerek. Qarjylandyrýǵa jaýapty «Yrys» qarjy uıymy men áleýmettik-kásipkerlik korporatsııa basshylary da jumysty shıratsyn. Az ǵana jobany ıgere almaı otyrsyzdar. Sharýalardyń, turǵyndardyń jobalary jyldam qarjylandyrylsyn», – dedi Darhan Satybaldy.
Májiliste Túrkistan oblystyq aýyl sharýashylyǵy basqarmasynyń basshysy Turǵanbek Ospanov pen oblystyq kásipkerlik jáne ónerkásip basqarmasynyń basshysy Nurjigit Myrzahmetovtyń esebi tyńdaldy. Joba arqyly 3 220 turǵynǵa nesıe berip, 3 413 jańa jumys ornyn ashý kózdelgen. Nátıjesinde ortasha aılyq kiris 1,5 esege, sút ónimin óndirý 40,6 paıyzǵa, et óndirý 63,2 paıyzǵa, jylyjaı ónimi 26,2 paıyzǵa, qus eti 2,4 paıyzǵa, balyq ónimi 2 paıyzǵa ulǵaıady dep josparlanǵan. Búginde Túrkistan oblysynda 3,6 mlrd teńgeniń jobasy maquldanǵan.
Bastapqyda bekitilgen qujattardyń tizbesi 16 bolyp bekitilgen. Joba aıasynda qaǵazbastylyqty joıý maqsatynda qajetti qujattar tizimi qaıta qaralyp, sany 8-ge deıin qysqartyldy. Bul aýyl turǵyndaryna qolaıly. «Aýyl amanaty» jobasy boıynsha Oblystyq kásipkerlik jáne ónerkásip basqarmasy tarapynan 50 bıznes jospar ázirlenip, turǵyndarǵa usynylǵan. Aýylda kásipkerlikti damytý, óndiris oryndaryn ashý baǵytynda da jumystar jalǵasady.