Túrkistan oblysynda 20-ǵa jýyq maman Prezıdenttiń kadr rezervine alynǵan

TÚRKІSTAN. QazAqparat – Túrkistan oblysynda memlekettik qyzmetkerler sany 124-ke azaıyp, aımaqta 610 memlekettik organda 7061 memlekettik qyzmetker jumys isteıdi. Bul týraly búgin oblystyq óńirlik kommýnıkatsııalar qyzmetinde QR Memlekettik qyzmet isteri agenttiginiń aýmaqtyq departament basshysy, Ádep jónindegi keńes tóraǵasy Bolat Isaqov málimdedi, dep habarlaıdy QazAqparat tilshisi.

2019 jyly atqarǵan jumysyn qorytyndylaǵan departament basshysy 1522 memlekettik qyzmetker jumystan bosatylǵanyn atap ótti.

«Ótken jyly qyzmetinen bosatylǵan mamandardyń 865-i ishki konkýrstar arqyly basqa laýazymǵa taǵaıyndalýyna baılanysty, teris sebeptermen 50 qyzmetshi, basqa sebeptermen 284 maman jáne taza aýysymdylyq boıynsha 323 qyzmetshi jumystan bosatylǵan», – dedi Bolat Isaqov.

Sondaı-aq, baspasóz jıynynda bos memlekettik laýazymǵa jarııalanǵan ishki konkýrsqa tómengi laýazymnan joǵary qyzmetke 525 maman taǵaıyndalyp, merıtokratııa deńgeıi 66,2% quraǵandyǵy málim boldy. Ótken jyly óńirde birneshe kezeńdi qamtyǵan irikteý nátıjesinde túrkistandyq 19 jas daryn Prezıdenttik jastar kadr rezerviniń quramyna alynǵan. Onyń 11-i memlekettik organnan, 4-i jeke sektordan, 3 – kvazısektordan jáne 1 ókil quqyq qorǵaý organynan. Aldaǵy bes jyl ishinde osy tulǵalarǵa konkýrstan tys ýákiletti komıssııanyń qorytyndysymen basshy laýazymdarǵa taǵaıyndaý múmkindigi beriledi.

Baspasóz jıynynda QR Prezıdenti janyndaǵy Memlekettik basqarý akademııasy oblystyq fılıalynyń dırektory Janat Momynqulov oblys ákimdigi jáne Memlekettik qyzmet isteri agenttigi departamentiniń qoldaýymen 1171 memlekettik qyzmetker biliktiligin arttyrý semınarlary men qaıta daıarlaý kýrstarynan ótkenin habarlady. Onyń 678-i jergilikti, al 446-y ortalyq organdar qyzmetshiler. Olardyń qatarynda aýdan qala ákimderi, ákim orynbasarlary, basqarma basshylary men orynbasarlary, aýyl ákimderi jáne sybaılas jemqorlyqqa qarsy qyzmet pen polıtsııa departamenti basshylary men qyzmetkerleri bar.

Aıta keteıik, fılıalda Akademııaǵa oqýǵa túskisi keletin 36 úmitkerden 17 (2 PhD) memlekettik qyzmetshi testpen iriktelip, aǵylshyn tilinen kýrstan (APTIS) ótýde. 1 qańtardan tirkeý bastaldy. APTIS emtıhany úshin 3 retke deıin múmkindik beriledi. Barlyq aqparatty www.apa.kz saıtynan jáne fılıaldan bilýge bolady.