Túrkistan oblysynda 2 myńnan astam oqýshy — «Altyn belgige» úmitker

TÚRKІSTAN. QazAqparat - Túrkistan oblysynda bıylǵy oqý jylynda jalpy 27 846 oqýshy mektep bitiredi. Onyń 2 084-i «Altyn belgige», 1 329-y úzdik attestatqa úmitker. Bul týraly búgin Óńirlik kommýnıkatsııalar qyzmetinde ótken brıfıngide oblystyq adamı áleýetti damytý basqarmasy basshysynyń orynbasary Ardaq Mádihanqyzy málimdedi, dep habarlaıdy QazAqparat.

Onyń aıtýynsha, karantındik rejımge baılanysty bıyl qorytyndy attestattaý jumystary sanıtarııalyq qaýipsizdik sharalaryn qatań saqtaı otyryp júrgiziledi.

«Óńirimizde 9-10 synyp oqýshylary 28 mamyr, 2 jáne 5 maýsym kúnderi bilim synaǵyn jazbasha túrde tapsyrady. Al, 11-12 synyp oqýshylary 1, 4, 7, 10 maýsym kúnderi synaqtan ótedi. Al, «Altyn belgige» úmitkerlerdiń emtıhan jumystaryn basqarma tarapynan qurylǵan komıssııa qaraıtyn bolady. Bul jumystarǵa 312 bilikti muǵalim qatysady dep josparlanyp otyr», – dedi Ardaq Mádihanqyzy.

Sondaı-aq, brıfıngte oblys kóleminde 2021 jyldyń 26 mamyr men 19 maýsym aralyǵynda jazǵy mektepter jumys isteıtini málim boldy. Onda oqý materıalyn meńgerýde qıyndyqtary bar, oqý úlgerimi tómen oqýshylarǵa qosymsha sabaqtar ótkiziletin bolady.