Túrkistan oblysynda 1800-ge jýyq baıqaýshy daıarlandy
Bul týraly búgin óńirlik kommýnıkatsııalar qyzmetinde ótken brıfıngte «Partııalyq emes baıqaý ortalyǵy» Respýblıkalyq qoǵamdyq birlestiginiń Túrkistan oblysy fılıalynyń basshysy Baqytjan Áshirbaev aıtty.
«Partııalyq emes baıqaý ortalyǵy» RQB-nyń Túrkistan oblysy fılıaly saılaý úderisine qoǵamdyq baıqaý júrgizý maqsatynda quryldy. Bul - ádil, ashyq saılaýǵa múddeli Qazaqstan azamattarynyń táýelsiz erikti birlestigi. Quramyna qoǵamdyq uıymdardyń ókilderi, jastar, sarapshylar, azamattyq belsendiler kiredi», - dedi Baqytjan Shákiruly.
Spıkerdiń sózinshe, saılaý ýaqytynda aqparattardy tıimdi basqarý jáne qaǵazbastylyqty azaıtý maqsatynda arnaıy baıqaýshy bloknottary barlyq baıqaýshylarǵa úlestirilgen.
«Partııalyq emes baıqaý ortalyǵy» RQB-nyń Túrkistan oblystyq fılıaly 20 qarasha kúni óńirdegi 893 saılaý ýchaskesinde baıqaý jumysyn uıymdastyrady. Ókildikte 17 koordınator jáne ár saılaý ýchaskesinde eki azamattan jalpy 1786 baıqaýshy bar. Bul rette, 90 mobıldi baıqaýshy, zańger jáne áleýmettik jelilerde saraptama júrgizetin eriktiler arqyly jumystar atqarady.
«Biz, azamattyq qoǵam ókilderi demokratııany damytýdy, qoǵamnyń memleketti basqarýdaǵy múmkindikterin keńeıtýdi jaqtaımyz. Aldaǵy saılaý - árbir qazaqstandyq úshin mańyzdy oqıǵa. Ol elimizdiń kóshbasshysyna qatysty halyqtyń tańdaýyn anyqtaıdy. Bizdiń basty maqsatymyz - búkil saılaý protsesiniń zańdylyǵy men ádildigin qamtamasyz etý, daýys berýdiń ashyqtyǵy men jarııalyǵynyń múltiksiz saqtalýyna atsalysý» , - dedi B.Áshirbaev.