Túrkistan oblysynda 138 sheteldik qamaýǵa alynyp, 124-i elden shyǵaryldy

NUR-SULTAN. QazAqparat – Oblysta kóshi-qon zańdylyǵyn buzǵan 3919 sheteldik pen Qazaqstan azamattary anyqtalyp, ákimshilik jaýapkershilikke tartyldy. Bul týraly Túrkistan oblystyq polıtsııa departamentiniń baspasóz qyzmeti málim etti, dep habarlaıdy QazAqparat.

«Atap aıtqanda 1495 adamǵa eskertý berilse, 1897-sine ákimshilik aıyppuldar salyndy. Al, 138 sheteldik ákimshilik qamaýǵa alyndy. Sondaı-aq, ózge elderdiń 124 azamaty el aýmaǵynan alastatyldy», - delingen málimdemede.

Sonymen qatar, oblysta jyl basynan beri 7784 sheteldik pen azamattyǵy joq tulǵalar qabyldaýshy taraptardyń habarlamalary negizinde esepke qoıylǵan. Bul - ótken jyldyń osy kezeńine qaraǵanda 3,5 paıyz artyq.

«Sheteldik jumys kúshin zańsyz paıdalanǵan 56 jáne sheteldikterdi zańsyz turǵyn úımen qamtamasyz etken 367 QR azamaty ákimshilik jaýapkershilikke tartyldy. Jyl basynan beri jalpy zańsyz kóshi-qonǵa qatysty 7 qylmystyq is qozǵaldy. Onyń ishinde memlekettik shekaradan zańsyz ótý boıynsha 2 is jáne zańsyz kóshi-qondy uıymdastyrýǵa baılanysty 5 is tirkelgen», - deıdi oblystyq PD baspasóz qyzmetinen.

Al, 842 adam Qazaqstan Respýblıkasynyń azamattyǵyna qabyldaý týraly aryzdanyp, 790-y jeńildetilgen tártippen qabyldandy. 118 tulǵanyń azamattyqqa qatystylyǵyn anyqtaý boıynsha ótinishteri qaralyp, qanaǵattandyrylǵan.

Aıta ketsek, 600-den astam sheteldik Soltústik Qazaqstan oblysynda jumys isteýge ruqsat surady.