Túrkistan oblysynda 102 jastaǵy qart maıdanger ardaqtaldy

TÚRKІSTAN. QazAqparat - Tólebı aýdanynyń ákimi Tólegen Telǵaraev jáne aýdandyq máslıhat tóraǵasy Nurlan Qoıbaǵarov Uly Jeńistiń 78 jyldyǵy qarsańynda 102 jastaǵy jaýynger Jumaǵulov Rysmet aqsaqaldyń úıine arnaıy baryp, merekemen quttyqtady, dep habarlaıdy oblys ákiminiń baspasóz qyzmeti.

– Sol bir zulmat jyldardy bastan keshken aldyńǵy aǵa býyn ókilderiniń tózimdiligi men erjúrektiligi búgingi jáne keleshek urpaq sanasynda naǵyz adamgershiliktiń, otansúıgishtiktiń úlgisindeı bolyp qala bermek. Tarıh enshisinde qalǵan soǵystyń surapyl jyldary endi qaıtalanbasyn dep tilep, sondaǵy aıbarly aǵa-ápkelerimizdiń jan aıamas jaýjúrektiligi men tyl eńbekkerleriniń eren eńbekterine qurmetpen bas ıemiz, – dedi aýdan basshysy.

El erteńi úshin kúresken qarııanyń shańyraǵyna arnaıy barǵan aýdan basshysy otan úshin oq pen ot keshken Jeńis soldatynyń estelik áńgimelerin tyńdap, aýdannyń jańalyǵyn, el jaıyn áńgimelep, syı-qurmet kórsetti. Qan maıdanda erlikpen qaza tapqan azamattardyń rýhyna bas ıip, quran baǵyshtaldy. Aqsaqal kelgen qonaqtarǵa aq batasyn berdi.

Ekinshi dúnıejúzilik soǵystyń aýdandaǵy jalǵyz kýágeri Rysmet qarııa 1921 jyly Tólebı aýdany, Leńgir qalasynda dúnıege kelgen. Ol 5 synypty bitirgen soń, qara jumysqa erte aralasyp, Georgıevka kolhozynda eńbek etken. 1942-1943 jyldary Uly Otan soǵysyna qatysyp, Stalıngradty qorǵaýǵa qatysqan. 1945-1974 jyldar aralyǵy kúzet bóliminde qaraýyl jáne qosalqy sharýashylyqta jumysshy bolǵan. Al, 1974-1976 jyldary Fosfor zaýytynda zeınetkerlikke shyqqansha eńbek etken.

Jumaǵulov Rysmet «Otan soǵysy» ordenimen, «G.K.Jýkov» atty merekelik medalimen marapattalǵan.