Túrkistan oblysynda 10 myńnan astam adam jumyspen qamtyldy

TÚRKІSTAN. QazAqparat - Mamyr aıynan bastap Túrkistan oblysynda 460 ınfraqurylymdyq joba iske asyrylýda, dep habarlaıdy QazAqparat óńir basshysynyń baspasóz qyzmetine silteme jasap.

«Jumyspen qamtýdyń jol kartasy» sheńberinde qolǵa alynǵan joba aıasynda 11 myńnan astam jańa jumys orny ashylǵan. Nátıjesinde 10 313 adam eńbekpen qamtyldy. Eń tómengi jalaqy - 85 myń teńge. Eń kóp jumys oryndary – qurylys salasynda.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetinshe, jumyspen qamtý ortalyqtary arqyly bos júrgen azamattardy jumysqa ornalastyrý qarastyrylǵan. Memlekettik baǵdarlamanyń maqsaty - jumyssyzdyq deńgeıin tómendetip, halyqtyń tabysyn arttyrý.

Jyl sońyna deıin Túrkistan qalasynyń ózinde 48 ınfraqurylymdyq joba júzege asady. Olardyń basym bóligi qalaǵa aýyz sý, gaz, elektr júıelerin tartýǵa baǵyttalǵan. Aýdan, qalalarda ornalasqan 100-ge jýyq mektepte sanıtarlyq toraptar retke keltiriledi. 100 shaqyrymdaı jol jóndelip, memlekettik jáne áleýmettik mekemelerdiń ǵımarattarynda pandýstar ornatylady.

Karantın kezinde jumys berýshiler tarapynan qajetti sanıtarlyq–epıdemıologııalyq talaptar saqtalǵan, qyzmetkerler jeke qaýipsizdik quraldarymen tolyq qamtamasyz etilgen. Aldaǵy ýaqytta ınfraqurylymdyq jobalardy iske asyrý barysynda 24 925 ýaqytsha jumys oryndary men 2000-nan astam turaqty jumys oryndaryn qurý josparlanyp otyr.