Túrkistan oblysynda 1 mektepte 42 egiz oqıdy
Arys qalasynyń Á. Jangeldın atyndaǵy №32 jalpy orta mektebinde 42 egiz bala bilim alady. 21 juptyń ishinde eki egiz oqýshy birinshi synyptyń tabaldyryǵynan attap otyr. Al, ótken jylǵy oqý jylynda bir egiz mektep bitirgen. Bir qyzyǵy egizder tek úshinshi synypta ǵana joq. Qalǵan 0-11 aralyǵyndaǵy synyptyń barlyǵynda bar.
«Bizdiń mektepti kópshilik egizder oqıtyn bilim ordasy dep biledi. Egizderdiń sabaq úlgerimi ár túrli. Arasynda úzdik oqıtyndary kóp. Al, kópshiliginiń deńgeıi ortasha. Degenmen, barshasynyń sabaqqa degen yntalary joǵary», - deıdi mektep dırektory Rahıma Júnisova.
Bilim ordasynda oqıtyn egizder ishinde bir úıden úsh jup bar. Máselen, Taısh otbasynyń Aqnur men Bıbinur esimdi qyzdary mektepke deıingi daıarlyq tobynda bilim alsa, besinshi synypta Sara men Salman esimdi jetkinshekteri bar. Al, Mıras pen Dıas esimdi balalary jetinshi synypqa baryp júr.
«Egizderdi ajyratý qıyn emes. Barshasynyń ózindik belgileri bar. Máselen, bir juptaǵy úlkeniniń boıy uzyn bolsa, ekinshisi alasa keledi», - deıdi Rahıma Júnisova.
Aıta keteıik, Á. Jangeldın mektebi 1993 jyly salynǵan. Búginde mektepte 1 660 bala bilim alady. Oqýshylarǵa 155 pedagog sabaq beredi.