Túrkistan oblysynda 1-5 synyptar aralas formatta oqı bastady

TÚRKІSTAN. QazAqparat - Túrkistan oblysy aýmaǵynda sanıtarlyq-epıdemıologııalyq jaǵdaıdyń jaqsarýyna baılanysty 1 naýryzdan bastap jalpy bilim beretin mektepterdiń 1-5 synyp jáne halyqaralyq mektepterdiń 1-7 synyp oqýshylaryn aralas formatta oqytýǵa ruqsat etildi, dep habarlaıdy QazAqparat.

ıAǵnı, pánderdiń 70% shtattyq rejımde, 30% qashyqtan oqytylady.

«Oqý bitiretin synyptar (9, 11 (12) synyptar) da aptanyń 6 kúninde aralas formatta oqytylady. Bilim berý mekemesi ákimshiliginiń sheshimi boıynsha sabaqtan tys ýaqytta 15 adamnan aspaıtyn toptarda oqýshylardy jeke oqytýǵa ruqsat beriledi. Kolledjder men joǵary oqý oryndarynyń I kýrs stýdentteri ekinshi semestrden bastap shtattyq oqýǵa kóshetin bolady», - dedi oblystyq Adamı áleýetti damytý basqarmasynyń basshysy Raqymbek Jolaev.

Sondaı-aq, «Baldáýren» respýblıkalyq oqý-saýyqtyrý ortalyǵy jáne «Bóbek» ulttyq ǵylymı-praktıkalyq bilim berý jáne saýyqtyrý ortalyǵy jumysyn bastaıdy.

Sonymen qatar, arnaıy mamandandyrylǵan uıymdar, erekshe bilim berý qajettiligi bar balalarǵa arnalǵan mektep-ınternattar, jalpy úlgidegi mektep-ınternattar jumysyn bastaıdy. Bilim berý mekemeleri maskalyq rejım jáne keminde 2 metr áleýmettik qashyqtyqty saqtaýy mindetti.

Aǵymdaǵy oqý jylynyń III toqsanynda bilim alýshylardyń, pedagogterdiń jáne basqa qyzmetkerlerdiń densaýlyǵyn saqtaý maqsatynda 1-11 synyptarda oqý protsesi 313 277 (63%) oqýshyǵa qashyqtan júrgizilýde.

Búgingi tańda, 5-ten 300 adamǵa deıin kontıngenti bar shalǵaıdaǵy 224 jalpy orta bilim beretin mektepte 29 827 oqýshy shtattyq rejımde oqýda. Bastaýysh 1-4 jáne 5-synyp oqýshylarynyń ata-analarynyń ótinishi negizinde 8 198 kezekshi topta 108 083 (44%) oqýshy bilim alýda. Oqý bitiretin 9-11 synyptardaǵy 48 707 oqýshyǵa pánderdiń 70% shtattyq rejımde, 30% qashyqtan uıymdastyrylǵan.