Túrkistan oblysynan bir jylda 455 otbasy soltústik óńirge qonys aýdarǵan
Basqosýda sondaı-aq «Serpin-2050» baǵdarlamasyn iske asyrý maqsatyndaǵy memlekettik qoldaý sharalary da sóz boldy.
Aıta keteıik, elimizde ishki eńbek mıgratsııasyna sońǵy jyldary erekshe kóńil bólinip, sol maqsatta tıisti jumystar júrgizilýde. Bul baǵdarlamalar Elbasy N.Nazarbaevtyń 2017 jylǵy Qazaqstan halqyna arnaǵan «Qazaqstannyń Úshinshi jańǵyrýy: jahandyq básekege qabilettilik» atty Joldaýynan bastaý aldy. Joldaýda basy artyq jumys kúshi bar óńirlerden basqa jerlerge, sondaı-aq, aýyldardan qalalarǵa jumys kúshin utymdylyqpen tartýǵa qoldaý kórsetý kerektigi aıtylǵan bolatyn.
Oblystyq QHA uıymdastyrǵan jıynǵa respýblıkanyń soltústik óńirlerinen kelgen jaýapty tulǵalar, oblystyq jumyspen qamtýdy úılestirý jáne áleýmettik baǵdarlamalar basqarmasynyń ókilderi, aýdan, qala ákimderiniń jaýapty orynbasarlary men bólim meńgerýshileri men BAQ ókilderi qatysty. Jıyn barysynda ishki mıgratsııany retteý, soltústik óńirlerge qonys aýdarýshy otbasylarǵa memlekettik qoldaý sharalary men «Serpin» baǵdarlamasy boıynsha túrkistandyq túlekterdiń soltústik óńirlerdegi joǵary oqý oryndaryna oqýǵa túsý múmkindikteri jan-jaqty talqylandy. Budan ózge Soltústik Qazaqstan oblysy Aqjar aýdany jumyspen qamtý ortalyǵynyń dırektory Bógenbaı Juryntaev, Aıyrtaý aýdany jumyspen qamtý bóliminiń basshysy Erlan Qazbekov, Túrkistan oblystyq jumyspen qamtýdy úılestirý jáne áleýmettik baǵdarlamalar basqarmasynyń mamany Malıka Ashatqyzy kún tártibindegi másele boıynsha baıandama jasap, qatysýshylardy tolǵandyrǵan suraqtarǵa jaýap berdi.
Túrkistan oblystyq jumyspen qamtýdy úılestirý jáne áleýmettik baǵdarlamalar basqarmasynyń mamany Malıka Ashatqyzynyń aıtýynsha, ótken jylǵy málimetke sáıkes ońtústikten 1768 adam soltústikke qonys aýdarǵan.
«Soltústik oblystarynda halyq az. Igerilmeı jatqan aýylsharýashylyq jerleri jeterlik. Memlekettik jáne bıýdjettik mekemelerde bos jumys oryndary bar. Kásip ashamyn degenderge tıimdi paıyzben nesıe bólinedi. Bastysy qonys aýdarýshynyń jumysqa degen yntasy bolsa jeterlik. Bul joba mıllıondar mekeninde eki qolǵa bir kúrek taba almaı júrgenderge tıimdi, sebebi memleketten qoldaý bar. Qysqasy, qandaı is bastasańyz da úkimet qamqorlyǵynda bolasyz»,- dedi sózin qorytyndylady Malıka Ashatqyzy.