Túrkistan oblysyna 441 mıllıard teńgeden astam ınvestıtsııa salyndy

TÚRKІSTAN. QazAqparat - Túrkistan oblysy boıynsha ótken jyly negizgi kapıtalǵa salynǵan ınvestıtsııa kólemi 441 mlrd 214 mln teńgeni qurap, 2018 jylmen salystyrǵanda 38,5% artty. Bul týraly Túrkistan oblystyq statıstıka departamentiniń basshysy Aıdar Ábildabekov Óńirlik kommýnıkatsııalar qyzmetinde ótken brıfıngte aıtty, dep habarlaıdy QazAqparat.

«Investıtsııa salymdarynyń basym bóligi ónerkásip jáne jyljymaıtyn múlik salalaryna tıesili. Negizgi ınvestıtsııalyq salymdardyń 85,3% shaǵyn kásiporyndar júzege asyrǵan. Olardyń kólemi 376 mlrd 207 mln teńgeni qurady», - dedi Aıdar Ábildabekov.

Budan ózge, Túrkistan oblysy boıynsha byltyr ónerkásip óndirisiniń kólemi — 498 mlrd 347 mln teńgeni qurap, 2018 jyldyń sáıkes kezeńimen salystyrǵanda 5,3% artqan.

Tıisinshe, oblystyń ónerkásip ónim kólemindegi respýblıkadaǵy úlesi 1,7% qurady. Al aýyl, orman jáne balyq sharýashylyǵy ónimderiniń jalpy kólemi ótken jyly 629 mlrd 816,2 mln teńge boldy, bul 2018 jylmen salystyrǵanda 4,7% artqandyǵyn kórsetip otyr. Respýblıkadaǵy aýyl sharýashylyǵy ónimderiniń jalpy úlesi boıynsha oblys 3-oryndy ıelendi.