Túrkistan oblysy OA elderiniń jaqyndasýyna sep bolady - sarapshy

ASTANA. QazAqparat - Túrkistan oblysynyń qurylýy Ortalyq Azııa aımaǵyndaǵy halyqtardyń jaqyndasýyna sep bolady. «Nur Otan» partııasy Taldaý, boljaý jáne strategııalyq bastamalar ınstıtýty Aqparattyq-kommýnıkatsııalyq jáne halyqaralyq yntymaqtastyq sektorynyń sarapshysy Aıdana Otarbaı osylaı deıdi, dep habarlaıdy QazAqparat tilshisi.

«Ońtústik Qazaqstan oblysy ataýynyń Túrkistan bolyp ózgerýi jáne Túrkistan qalasyn aımaq ortalyǵy retinde anyqtaý - bul zańdy úrdis. Eń aldymen, bul tarıhı tamyrlar men tarıhı ótkelderge júginip, zor rýhanı órleýdi seziný», - deıdi Aıdana Otarbaı.

Sarapshynyń aıtýynsha, Qazaqstannyń zamanaýı tarıhynda oblys ortalyqtary eki ret aýystyrylǵan. 1999 jyly Kókshetaý oblysynyń birqatar aımaqtary Aqmola oblysynyń quramyna berilip, al onyń oblys ortalyǵy Astanadan Kókshetaýǵa aýystyrylǵan. 2001 jyly Almaty oblysynyń ákimshilik ortalyǵy Almatydan Taldyqorǵanǵa kóshirildi.

«Túrkistan - ǵasyrlar boıy Qazaq handyǵy men búkil túrki áleminiń áleýmettik-ákimshilik ortalyǵy, saıası jáne tarıhı ómiriniń júregi bolǵan rýhanı astana. Buryn Túrkistan sózi búkil Ortalyq Azııany ataý maqsatynda qoldanylǵan. Túrkistan general-gýbernatorlyǵy barlyǵymyzdyń esimizde. Endi Elbasy Nursultan Nazarbaevtyń bastamasymen Túrkistan oblysy da óz tarıhyn qaıta bastady. Bul bastama, birinshi rette, Ortalyq Azııa aımaǵyndaǵy halyqtardyń jaqyndasýyna sep bolady. Sózsiz, bul halyqaralyq turǵyda kórshi memlekettermen yntymaqtastyqty keńeıtý jáne nyǵaıtýda óte mańyzdy oqıǵa», - deıdi sarapshy.

Sarapshy óz sózinde búgingi kúni Túrkistan oblysy jańa ákimshilik qyzmetterdi sapaly oryndaý maqsatynda barlyq múmkindikterdi ıelengenin aıtady. Sonymen birge, qala jáne aımaq damýyna tıimdi áserin tıgizetin jańa sýbsıdııalar men qarjylyq áserler tartyla bastaıdy.

«Qala agrarlyq turǵydan basymyraq damyp, búkil respýblıka úshin azyq-túliktik bazaǵa aınalady. Sarapshylardyń aıtýynsha, 2025 jylǵa qaraı ekonomıkalyq ósýdiń negizgi draıveri aýyl sharýashylyǵy ónimderin qaıta óńdeý bolyp tabylady. Ákimshilik ortalyqtyń kóshirilýi jańa jumys oryndaryn shoǵyrlandyryp, eńbekke jaramdy halyqtyń basym kópshiligin jumys oryndarymen qamtýǵa septigin tıgizedi. Jańa áleýmettik, turǵyn úı jáne basqa da jobalar qarqyndy túrde júzege asyrylatyn bolady. Túrkistan úshin bul aımaqtaǵy áleýmettik qaýyrttylyqty báseńdetýge zor múmkindik beredi», - deıdi ol.

Aıdana Otarbaı sonymen qatar, Shymkent qalasy megapolıs dárejesinde tek bizdiń memleketimiz úshin ǵana emes, búkil Ortalyq Azııa aımaqtary úshin de ınvestıtsııalar, tehnologııalar jáne zııatkerlik resýrstardy tartýshy jańa ortalyq bolatynyn atap ótti.

«Ońtústik Qazaqstan oblysy ataýynyń Túrkistan oblysy bolyp ózgertilýi jáne Túrkistan qalasynyń aımaq ortalyǵy retinde anyqtalýy - Qazaqstan tarıhynyń jańa paraǵy ashylǵandyǵynyń sózsiz belgisi», - dep túıdi sarapshy.