Túrkistan oblysy men Shymkentte ınvestıtsııalyq belsendilik joǵarylady

NUR-SULTAN. QazAqparat – Ótken jyly 12 óńir ınvestıtsııalyq belsendilik kórsetti. Bul týraly Úkimet otyrysynda QR Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Óńirlerdiń kóbinde joǵary ınvestıtsııalyq belsendilik baıqalady. 12 óńir ósim kórsetti, onyń ishinde 5 óńirde 20 paıyzdan 60 paıyzǵa deıin ósim tirkeldi. Eń joǵary kórsetkishter Túrkistan oblysynda jáne Shymkent qalasynda baıqalyp otyr», dedi ol.

Mınıstrdiń dereginshe, 5 óńirde ınvestıtsııalyq belsendiliktiń tómendeýi tirkeldi. Olar: Qyzylorda, Atyraý, Batys Qazaqstan, Qaraǵandy jáne Pavlodar oblystary.

«Tutastaı alǵanda, negizgi kapıtalǵa 12,3 trln teńge ınvestıtsııa tartyldy. Investıtsııalar ken óndirý ónerkásibin esepke almaǵanda 14,8 paıyzǵa ósti», - dedi Rýslan Dálenov.