Túrkistan oblysy qurylǵan 5 jyldan beri óńirlik ishki ónim eki ese artqan

ASTANA. QazAqparat – Túrkistan oblysynyń ákimi Darhan Satybaldy ortalyq kommýnıkatsııalar qyzmetinde ótken brıfıngide oblystyń óńirlik ishki ónimi keıingi 5 jylda 2 ese artqanyn málim etti, dep habarlaıdy QazAqparat tilshisi.

«Bıyl Túrkistan oblysynyń qurylǵanyna 5 jyl toldy. Oblys ortalyǵy – Túrkistan qalasyn rýhanı astana retinde damytý baǵytynda qabyldanǵan sharalar óńir ekonomıkasynyń damýyna tyń serpin berdi. Ekonomıkanyń basty kórsetkishi jalpy óńirlik ónim kólemi 5 jylda 2 ese ósip, 3,5 trln teńgege jetti. Ónerkásip ónim kólemi 2 esege artyp, 867 mlrd teńge boldy. 2018-2022 jyldary Indýstrııalandyrý kartasy aıasynda jalpy quny 56 mlrd teńge bolatyn 43 joba iske asyrylyp, 2834 jańa jumys orny quryldy», - dedi ákim.

Aımaq basshysy oblystyń ónerkásiptik áleýetin damytýǵa múmkindik beretin birneshe mańyzdy iri jobany iske asyrý josparda bar ekenin atap ótti.