Túrkistan oblysy halqyn «kedeı» dep aıtýdy qoldamaımyn – Ómirzaq Shókeev

TÚRKІSTAN. QazAqparat – Túrkistan óńiriniń halqyn «kedeı» dep aıtýdy qoldamaımyn. Bul týraly óńir basshysy Ómirzaq Shókeev búgin Ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

Maýsym aıynyń basynda Ulttyq statıstıka bıýrosy óńirler boıynsha 2021 jyldaǵy ortasha jalaqy týraly málimet usynǵan bolatyn. Oǵan sáıkes, eń tómen aılyq (195,3 myń teńge) beriletin óńirler qatarynda Túrkistan oblysy bar.

«Bizdiń oblysta halyq kóp, 2 mln asady. Kópbalaly analardyń úshten biri – Túrkistan oblysynda. Sondyqtan adam basyna shaqqanda tabys az bolyp kórinedi. Bulaı baǵa berý – ádilsizdik. Sondyqtan Túrkistan óńiriniń halqyn «kedeı» dep aıtýdy qoldamaımyn.

Taǵy bir másele, Túrkistan oblysy Shymkentten bólinip shyqqan soń, tek aýyl sharýashylyǵy salasyna beıim oblys bolyp qaldy. Ondaǵy tabys, óndiris pen kásipkerlikten birshama tómen. Biraqtan biz óndiristi damytyp jatyrmyz, qýyp jetemiz», - dedi Ó.Shókeev.

Sondaı-aq oblys ákimi óńirdegi qant tapshylyǵyna qatysty aıtyp ótti.

«Statıstıkalyq málimette qant baǵasy 450 teńge dep tursa da, qara bazarda 740 teńgeden satylýda. Al áleýmettik dúkenderde 350 teńgeden saýdalanyp jatyr. Jaqyn kúnderi 3 vagon qant keledi. Qazir qanttyń 20 kúndik qory bar», - dedi Ó.Shókeev.