Túrkistan oblysy ákiminiń orynbasary Ordabasy aýdanyndaǵy ınvestjobalardy tekserdi

TÚRKІSTAN. QazAqparat – Túrkistan oblysy ákiminiń orynbasary Meıirjan Myrzalıev issaparmen Ordabasy aýdanyna baryp, óńirdegi ınvestıtsııalyq jobalardyń iske asyrylý barysymen tanysty.

«Badam» qazaq-túrik ındýstrıaldy aımaǵynyń damý qarqynyn kórip qaıtty, dep habarlaıdy QazAqparat tilshisi.

Meıirjan Myrzalıev ındýstrıaldy aımaqtaǵy ınfraqurylym qýaty men onyń ishinde elektr jáne gazben jabdyqtaý jumystaryn kórip shyǵyp, sýmen qamtamasyz etý jáne káriz júıeleriniń qýatyn 52 ga deıin ulǵaıtý boıynsha jańa jobany ázirleýge tapsyrma berdi.

Oblys ákiminiń orynbasary kezdesýde jaýapty sala basshylarymen ınfraqurylymǵa qatysty máseleni sheshýdiń yqtımal joldaryn talqylady.

Aıta keteıik, Ordabasy aýdanynda ornalasqan «Badam» qazaq-túrik ındýstrıaldy aımaǵynyń qurylysy 2012 jyly bastalǵan bolatyn. Búginde onda jalpy ınvestıtsııa qarajaty 4,6 mlrd teńgeni quraıtyn 4 óndiris orny jumys isteýde. Sonymen qatar, irgeles jerde atalmysh ındýstrıaldy aımaqtyń ınfraqurylymyn paıdalanatyn 4 kásiporyn ornalasqan. Olardyń ınvestıtsııa quny 20,7 mlrd teńgeni quraıdy. Alaıda, qazirgi ýaqytta qoldanystaǵy ınfraqurylym qýaty jumys istep turǵan zaýyttardyń suranysyn jabý úshin jetkiliksiz. Óıtkeni, bastapqyda júrgizilgen ınfraqurylym kásiporyndardyń mundaı joǵary suranysyna eseptelmegen bolatyn. Sarapshylardyń pikirinshe, jańa serpilis jasaǵaly otyrǵan «Badam» ındýstrıaldy aımaǵy áleýetti ınvestorlar úshin óte yńǵaıly ári utymdy joba bolmaq.

Onyń ústine Shymkent qalasyna jaqyn ornalasqandyǵy da óndiris oryndarynyń qyzmetine óte tıimdi.