Túrkistan oblys ortalyǵy bolýǵa ábden laıyq - Elbasy

ASTANA. QazAqparat - Túrkistan syrtqy jáne ishki týrıster men jergilikti turǵyndar úshin óte qolaıly. Búgin Elbasy Nursultan Nazarbaev oblys ortalyǵyn Túrkistan qalasyna kóshirý týraly Jarlyqqa qol qoıý kezinde osylaı málim etti, dep habarlaıdy QazAqparat.

Aıta keteıik, atalǵan tırıhı oqıǵaǵa baılanysty jazylǵan beınetúsirilimdi AkordaPress áleýmettik jelidegi paraqshasynda jarııalady.

Túrkistan Qazaq handyǵynyń ordasy bolǵan ári rýhanı taǵylymy mol tarıhty meken ekenine toqtalǵan Memleket basshysy, «Jıyrmasynshy ǵasyrdyń basynda qazaqtyń birtýar azamattarynyń el múddesi úshin júrgizgen saıası kúresi de Túrkistan ataýymen tyǵyz baılanysty bolǵanyn bilemiz. Shejireli ólke musylmandar úshin de qasıetti bolyp sanalady», - dedi.

Sonymen qatar, Prezıdent bul qala Uly Jibek jolynyń boıynda ornalasqan úlken órkenıet ortalyǵy ekenin qadap aıtty.

«Tek qazaq eliniń ǵana emes, búkil túrki jurtynyń zııarat jasaıtyn qasterli orny. Onyń rýhanı ómirinde Qoja Ahmet ıAsaýı kesenesiniń úlken orny bar ekenin bilemiz. Tarıhy tereń Túrkistannyń týrızm úshin de mańyzdylyǵy erekshe. Qalanyń toǵyz joldyń torabynda ornalasýy syrtqy jáne ishki týrıster men jergilikti turǵyndar úshin óte qolaıly. Sondyqtan Túrkistan qaı jaǵynan alsaq ta, oblys ortalyǵy bolýǵa ábden laıyq», - dep atap ótti Elbasy.

Budan buryn habarlanǵandaı, QR Prezıdenti Nursultan Nazarbaev «Qazaqstan Respýblıkasynyń ákimshilik-aýmaqtyq qurylysynyń keıbir máseleleri týraly» Jarlyqqa qol qoıdy.

Búgin Elbasy Nursultan Nazarbaev Túrkistan oblysynyń paıda bolýyna baılanysty pikir bildirdi.