Túrkistan men Tatarstan tsıfrlandyrý salasynda memorandým jasasty
Tatar eliniń beldi kásipkerler tobyn bastap kelgen azamattarǵa, aldymen, alǵysyn bildirgen óńir basshysy baýyrlas elderdi baılanystyratyn tereń tarıhymyz ben tilder uqsastyǵy, salt-dástúrlerimizdiń qazirgi yntymaqtastyǵyna berik negiz bolatynyn jetkizdi. Túrkistannyń jańaryp, jańǵyryp jatqan tusynda aǵaıyn tatar jurtymen ónerkásip, saýda-ekonomıkalyq, ınvestıtsııalyq, sonymen birge, turǵyn úı-kommýnaldyq sharýashylyǵy, týrızm, kólik jáne qaýipsizdik salalaryna IT-tehnologııa júıelerin engizýde áriptestik ornatýǵa yntaly ekenin meńzedi. Sondaı-aq J.Túımebaev Túrkistan men Tatarstan astanasy Qazan qalasyn baýyrlas qalalarǵa aınaldyrý usynysyn jetkizdi.
Óz kezeginde, Tatarstannyń Qazaqstandaǵy Ókiletti ýákili D.Valeev Túrkistan oblysymen kóptegen salalarda yntymaqtastyq ornatýǵa daıyn ekenin bildirip, baýyrlas ulttardyń rýhanı baılanysy da bekı túsetinine senim artty.
Ekijaqty otyrys nátıjesinde, Túrkistan oblysynyń ákimdigi men Tatarstannyń «BARS Grýp» AQ arasynda ınnovatsııalyq aqparattyq tehnologııalar jáne tsıfrlandyrý salasynda yntymaqtastyq memorandýmy jasaldy. Qujatta elektrondy memlekettik qyzmet kórsetýde ınnovatsııalyq aqparattyq tehnologııalardy damytý syndy máseleler qamtylǵan.
Aıta ketken jón, 2017 jyly Qazaqstan men Tatarstan arasyndaǵy saýda aınalymy 700 mln AQSh dollaryn qurap, 2016 jylmen salystyrǵanda 1,7 esege ósken. Búginde qos eldiń kásipkerleri mashına qurastyrý, munaıhımııa, áskerı-tehnıkalyq, kólik-logıstıkalyq salalary aıasynda áriptestik ornatyp keledi. Astanalary - Astana men Qazan qalalary baýyrlas shaharlary bolyp tabylsa, Almaty men Qazan áriptes qalalar sanalady.