Túrkistan men Qyzylorda oblystarynyń fermelerine sý jetispeýshiligi týyndaýy múmkin

NUR-SULTAN. QazAqparat – Túrkistan men Qyzylorda oblystarynyń fermelerin sýmen qamtamasyz etýde problema týyndaýy múmkin. Bul týraly QR Ekologııa, geologııa jáne tabıǵı resýrstar vıtse-mınıstri Serik Qojanııazov aıtty, dep habarlaıdy QazAqparat tilshisi.

Syrdarııa ózeni bassseıni erekshe alańdaýshylyq týdyryp otyr. Aldyn ala esepteýlerge sáıkes, vegetatsııaaralyq kezeńde Shardara sý qoımasyna sýdyń kelip quıylýy barynsha tómen bolatyndyǵy kútiledi. Ony toltyrý barysynda úlken qıyndyqqa tap bolyp otyrmyz. Sondyqtan, ózenniń tómengi aǵysynan sý jiberýdi shektedik. Vegetatsııaaralyq kezeńde Syrdarııanyń tómengi jaǵy 2 mlrd tekshe metr sý ala almady», - dedi ol mınıstrliktiń alqa májilisinde.

Onyń atap ótýinshe, Shardara sý qoımasy Kóksaraı sý rettegishinen ótken jylǵa qaraǵanda 770 mln tekshe metr sýdy kem aldy.

«Aǵyp keletin sý kóleminiń tómen boljanýyna baılanysty sý qoımasyn toltyrý qıyndyq týyndatady. Sonyń saldarynan Túrkistan men Qyzylorda oblystarynyń fermelerin sýarmaly sýmen qamtamasyz etýde problemalar týyndaýy, sonymen qatar Aral mańynyń ekologııalyq ahýaly kúrdelenýi yqtımal», - dedi Serik Qojanııazov.