Túrkistan mektepteri kúnnen qýat alatyn boldy
«Eni» kompanııasy men Qazaqstandaǵy Birikken Ulttar Uıymynyń damý baǵdarlamasy jáne Túrkistan oblysynyń ákimdigi birlese qolǵa alǵan joba aıasynda kún panelimen syrtqy jaryqtandyrý shamdary ornatylyp, oqý synyptaryndaǵy jaryqtandyrý júıesi jańǵyrtyldy.
Arnaıy jylý retteý klapandary, energııa únemdeıtin quraldar, sý qubyryna eseptegishter, jaryqdıodty shamdar, termorettegishter ornatyldy.
Osy jobanyń kómegimen 1900 oqýshy bilim alatyn mektep kún elektr stantsııasynyń ıgiligin kóredi.
«Túrkistanda tarıhı oqıǵanyń kýási bolyp turmyz. Mektep salý basqa, al onyń zamanaýı oqý bólmelerimen, tehnologııamen qamtý úlken másele. Búgin osy mektepke kún elektr qondyrǵysyn ornatyp otyrmyz. Joba boıynsha birinshiden mekteptiń elektr qýatyna jumsaıtyn shyǵyny edáýir azaıady, ekinshiden, oqýshylar jańartylatyn energııa qalaı óndiriletinin óz kózimen kórip ósedi», – dedi oblys ákimi Ómirzaq Shókeev.
Mektepti jańǵyrtý jobasy bilim ordasyndaǵy shyǵyndardy, energııa tutynýdy jáne kómirqyshqyl gazy mólsherin qysqartady.
«Jasyl» ekonomıkany damytýǵa, qorshaǵan ortany qorǵaýǵa, aýany tazartýǵa múmkindik beredi.
«Eni» men BUUDB osy jobany úlgi retinde ala otyryp, elde qýat únemdeý baǵdarlamalaryn jalǵastyrýdy kózdep otyr.
«2060 jylǵa qaraı kómirtekti beıtaraptyq maqsatyna jetý – Qazaqstan úshin de, álem elderi úshin de asa mańyzdy basymdyq. BUUDB energetıka sektoryndaǵy transformatsııa aıasynda QR Úkimetimen jáne barlyq seriktestermen jemisti yntymaqtastyqty jalǵastyrýǵa nıetti», – dedi BUU damý baǵdarlamasynyń Qazaqstandaǵy turaqty ókili ıAkýp Berısh.