Túrkistan mańaıynan 2 nanospýtnık ushyryldy
Nanospýtnıkterdiń ushyrylymy – tájirıbelik synaq. Ony Ál-Farabı atyndaǵy Qazaq ulttyq ýnıversıteti UNICEF-Qazaqstanmen birlesken UniSat bilim berý habynyń ashylýy aıasynda júzege asyryp otyr.
UniSat – bul Ál-Farabı atyndaǵy QazUÝ men UNICEF-Qazaqstannyń birlesken bilim berý baǵdarlamasy. Onyń maqsaty – nanospýtnıkterdi jasaý salasynda qyzdardyń bilimi men biliktiligin damytý. Baǵdarlama genderlik stereotıpterdi joıýǵa jáne STEM bilim berý salasyndaǵy qyzdardyń úlesin arttyrýǵa baǵyttalǵan.
UniSat spýtnıkteri bilim berý maqsattaryna arnalǵan jáne salmaǵy 1-den 10 keli aralyǵyndaǵy shaǵyn ǵarysh apparattary klasyna jatady. Olar birneshe kamera jáne sensorlarmen jabdyqtalǵan. Qabyldaǵyshtar aýa temperatýrasy, qysymy, ylǵaldyǵy týraly málimetterdi jınaıdy. Al aýanyń lastanǵanyn ólsheıtin qabyldaǵyshtar adam aǵzasyna óte qaýipti bolyp sanalatyn PM2,5 jáne PM10 mıkrobólshekteriniń kontsentratsııasyn anyqtaıdy. Spýtnıkti keleshekte ǵaryshqa ushyrý kózdelip otyr.
Spýtnıkti iske qospas buryn qatysýshylar UniSat nanospýtnıkteriniń ishki júıelerin ózderi baǵdarlamalap, zerthanalyq jaǵdaıda synap kórgen. Oqýshylar ǵalymdardyń jetekshiligimen nanospýtnıkten alynǵan derekterdi óńdeýdi úırenip, derekterdi vızýalızatsııalaýdy jáne mıssııanyń sońǵy esebin jazýdy meńgerdi.
Málim bolǵandaı, Ál-Farabı atyndaǵy Qazaq ulttyq ýnıversıteti búginge deıin Al-Farabi-1 jáne Al-Farabi-2 nanospýtnıkterin ushyrǵan. 2018 jyly Ilon Masktyń ataqty SpaceX kompanııasynyń kómegimen ushyrylǵan nanospýtnık áli kúnge deıin shtattyq rejımde jumys istep tur.
Foto: kaznu.kz