Túrkistan, Qyzylorda jáne Jambyl oblystarynda sý sharýashylyǵyndaǵy jaǵdaı kúrdeli - mınıstr

ASTANA. QazAqparat – Búgin Úkimet otyrysynda Ekologııa jáne tabıǵı resýrstar mınıstri Zúlfııa Súleımenova Qyzylorda oblysyndaǵy kúrish alqaptaryn azaıtýǵa qatysty pikir bildirdi, dep habarlaıdy QazAqparat tilshisi.

Onyń aıtýynsha, Qyzylorda oblysynda shilde aıynda kúrish alqaptaryn sýmen qamtamasyz etýde qıyndyqtar týyndaýy múmkin.

«2023 jyly kúrishti 83,9 myń gektarǵa egý josparlanyp, is júzinde 88,107 myń gektar egildi. Bul 2022 jylmen salystyrǵanda 9,8 myń gektarǵa artyq. Aıta ketý kerek, mınıstrlik oblysta kúrish alqabyn qysqartý qajet ekenin birneshe ret eskertken bolatyn. Sý tapshylyǵyna baılanysty Basseındik ınspektsııa turaqty sýarýǵa arnalǵan lımıtti qysqartty», - dedi Z. Súleımenova.

Onyń sózine qaraǵanda, Almaty jáne Jetisý oblysy boıynsha sý sharýashylyǵyndaǵy jaǵdaı turaqty. Osy oblystardaǵy barlyq sý qoımalary vegetatsııalyq kezeńge bekitilgen kestege sáıkes jumys istep jatyr.

«Jalpy Túrkistan, Qyzylorda jáne Jambyl oblystaryndaǵy sý sharýashylyǵyndaǵy jaǵdaı kúrdeli bolyp qala beredi. Jaǵdaı turaqty baqylaýda jáne Mınıstrlik sý tapshylyǵynyń saldaryn jeńildetý úshin barlyq qajet sharalardy qabyldaıdy», - dedi vedomstvo basshysy.

Budan buryn habarlanǵandaı, Túrkistan oblysynyń ákimdigine sý kóp jumsalatyn daqyldardy azaıtý usynyldy.