Túrkistan qurylysyna jastardy tartý qajet - Nursultan Nazarbaev
«Qazir búkil Qazaqstanda aýqymdy qurylys jumystary júrip jatyr. Úıler, zaýyttar salynýda. Bizdiń jas kezimizde, stýdent kezimizde arnaıy stýdentter otrıady degen bolatyn. Demalys kezinde jumys istep, qomaqty aqsha tabatynbyz. Osyǵan baılanysty qurylys jumystaryna jastardy tartýdy tapsyramyn», - dedi Elbasy.
Osyy rette Memleket basshysy ótken jyly jańadan qurylǵan Túrkistan oblysynyń ortalyǵy Túrkistan qalasynda qurylys qarqyndy júrip jatqandyǵyn eske saldy.
«Túrkistan oblys ortalyǵy retinde taıaý jyldary úlken qala bolady dep otyrmyz. Onyń qurylysyna jastar atsalysýy kerek. Úkimet oblys ákimimen birlesip, bul máseleni baqylaýǵa alýy tıis», - dedi Nursultan Nazarbaev.
Aıta keteıik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.
Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.
Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.
Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıtqan bolatyn Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.