Túrkistan qalasynda jasandy kóli bar saıabaq ashyldy

TÚRKІSTAN. QazAqparat - Túrkistan qalasynda Prezıdent saıabaǵy ashyldy. Aýmaǵy 40 gektar bolatyn saıabaqqa 7 myńnan astam aǵash, 43 myń túpten astam gúl egilgen, dep habarlaıdy QazAqparat tilshisi.

Mundaǵy jasandy kóldiń syıymdylyǵy - 100 myń tekshe metrge jýyq. Tereńdigi – 4 metr.

Munda qaıyqpen serýendeýge, sý sportymen shuǵyldanýǵa múmkindik bar. Jalpy saıabaqtyń kógaldandyrylǵan aýmaǵynyń kólemi – 25 gektarǵa jýyq, 3500 sharshy metrge gúl egilgen.

Alleıa, sýburqaqtary men balalar oıyn alańshalary, oryndyqtary men júgirý jáne velojoly bar.

Sonymen birge jańa saıabaqta 7 myńnan astam aǵash, 43 myń túpten astam gúl egilgen.

Álemniń birneshe memleketinen elimizde sırek kezdesetin aǵash túrleri ákelingen. Jaryqshamdar ornatylǵan.

Aldaǵy ýaqytta saıabaqta kásipkerlikti damytý, halyqtyń ál-aýqatyn arttyrýǵa baǵyttalǵan birshama jobalar júzege aspaq.

Saıabaqtyń ashylýyna oraı «Túrkistan marjandary» merekelik keshi uıymdastyryldy.

Túrkistannyń jańa týrıstik ornyna arnaıy kelgen turǵyndar men qonaqtarǵa Túrkistan qalalyq mádenıet úıiniń ónerpazdary kontserttik baǵdarlamasyn usyndy.

Kesh sońy jalpyhalyqtyq serýenge ulasty.