Túrkistan qalasyna otyrǵyzylǵan aǵashtardyń kóbi jersinbeı qýrap ketti

TÚRKІSTAN. QazAqparat - Túrkistan qalasyna otyrǵyzylǵan aǵashtardyń kópshiligi jersinbedi. Bul týraly Túrkistan oblysynyń ákimi Darhan Satybaldy Túrkistan qalasynyń halqymen kezdesýinde aıtty, dep habarlaıdy QazAqparat tilshisi.

Túrkistan qalasynda alleıalar men kóshelerge otyrǵyzylǵan aǵashtar qýrap jatyr.

Túrkistan oblysynyń ákimimen kezdesýde qala turǵyndary tarapynan osy másele kóterildi.

Bul jaǵdaımen etene tanys ekendigin aıtqan Darhan Satybaldy aldaǵy ýaqytta kógaldandyrý isine ǵalymdar tartylatynyn jetkizdi.

Sonyń nátıjesinde tabıǵatqa qolaıly aǵashtardy otyrǵyzý isi qolǵa alynady.

«Kógaldandyrýǵa baılanysty syndy men kórip otyrmyn. Áleýmettik jeliden de oqımyn. Tıisti basqarmalar men qala ákimdigine tapsyrma berdim. Bul tek Túrkistan qalasynda ǵana emes, basqa aýmaqtarda da osyndaı másele bar. Túrkistandaǵy parkter men alleıalardy kórseńizder, keı jerlerde shyrsha, al keıbir jerde basqa aǵashtar egilgen. Biraq olardyń kóbi jersinbeı otyr»-dedi Darhan Satybaldy.

Al, Túrkistan qalasynyń ákimi Nurbol Turashbekov qaladaǵy aǵashtar keshki saǵat 19:00 ben tańǵy saǵat 06:00 aralyǵynda 40 tehnıkamen sýarylyp jatqanyn aıtty.

Munan bólek, Arys-Túrkistan kanaly jáne Qosqorǵan sý qoımasy men uńǵyma arqyly sýarý jumysy júrgizilip jatqanyn jetkizdi.