Túrkistan qalasyna aǵyn sý qalaı jetkizildi
«Sońǵy 3 jylda atqarylǵan aýqymdy jumystar nátıjesinde Túrkistan qalasyn damytýdyń 1-kezeńi aıaqtalyp, negizgi áleýmettik-ınfraqurylymy qalandy. Jalpy sońǵy 3 jylda 536 joba iske asyp, onyń 251 nysannyń qurylysy aıaqtalyp paıdalanýǵa berildi. Halyqaralyq áýejaı, ákimshilik-iskerlik jáne rýhanı-mádenı ortalyqtary salyndy, olardy ózara baılanystyratyn dańǵyldar qaıta jóndeýden ótti. Arnaıy ekonomıkalyq jáne ındýstrıaldy aımaqtar quryldy», - dedi Ó. Shókeev Ortalyq kommýnıkatsııalar qyzmetinde ótken baspasóz máslıhatynda.
Ákimniń aıtýynsha, qala kógildir otynmen jáne aýyz sýmen 100% qamtamasyz etilgen. Qalanyń ekologııalyq jaǵdaıyn jaqsartý maqsatynda Jasyl beldeý qurylyp, 13 myń ga jerge 3,5 mln túp aǵash egilgen.
«Aǵyn sý jaǵdaıy boıynsha Túrkistan qalasyna 234 mln tekshe metr aǵyn sý jetispeıtin edi. Onyń sebebi – bar sýdy jınap, tolyqtaı Túrkistanǵa deıin jetkizý máselesi qolǵa alynbaǵan edi. Ǵalymdar men aýyl aqsaqaldarynyń pikirlerin tyńdaı kele, Túrkistan qalasyna 550 mln tekshe metr aǵyn sý jetkizýdiń jolyn taptyq. Birinshiden, «Túrkistan magıstraldy kanalyn kúrdeli jóndeý» jobasy arqyly 60 mln tekshe metr sý únemdeledi jáne qala aýmaǵyndaǵy 8 shaqyrym kanal boıy abattandyrylady. Buryn aǵyn sý 43%-ǵa fıltratsııalyq shyǵynǵa ushyrasa, búgingi kúni betondaý jumystarynyń 60 mln tekshe metr sý únemdeledi», - dedi Ó. Shókeev.
Ekinshiden, jańadan «Keńsaı - Qosqorǵan - 2» sý qoımasyn salyndy. Bul qoıma arqyly 31 mln tekshe metr aǵyn sý jetkiziledi. Bul – otyz jylda salynǵan óńirdegi birinshi sý qoımasy. Nátıjesinde qazirgi tańda úlken toǵan bıiktigi 26 metrge deıin kóterilip, 90% betonmen qaptaldy.
«Arys-Túrkistan magıstraldyq arnasyn tolyqtyrý úshin Syrdarııa ózeninen mashınalyq arna salý» arqyly 52 mln tekshe metr aǵyn sý jetkiziledi. Budan bólek, Jańadan «Sarqyrama» sý qoımasyn salý arqyly 65 mln tekshe metr aǵyn sý Túrkistanǵa jetkiziledi. Kentaý qalasynda sýdy tómendetý júıesin salý jobasy arqyly 40 mln tekshe metr aǵyn sý jetkiziledi. Sonda biz 200 mln tekshe metr sýdy Túrkistanǵa jetkizetin bolamyz», - dep túsindirdi Ó. Shókeev.