Túrkistan Horvatııamen yntymaqtastyqty nyǵaıtady

TÚRKІSTAN. QazAqparat - Túrkistan oblysynyń ákimi Ómirzaq Shókeev Horvatııanyń Qazaqstandaǵy Tótenshe jáne Ókiletti elshisi Refık Shabanovıchpen kezdesti, dep habarlaıdy QazAqparat óńir basshysynyń baspasóz qyzmetine silteme jasap.

Júzdesý barysynda taraptar Horvatııa men Túrkistan oblysy arasyndaǵy ózara tıimdi yntymaqtastyqtyń perspektıvalaryn talqylady. Sondaı-aq, taraptar týrızm, sport jáne aýyl sharýashylyǵyn damytý týraly pikir almasty. Oblys ákimi eki el arasyndaǵy aldaǵy jemisti yntymaqtastyqqa senim bildirdi.

«Keler jyly elderimiz arasynda dıplomatııalyq qatynastardyń ornaǵanyna 30 jyl tolady. Bizge Horvatııanyń aqparattyq tehnologııany, týrızm men sport salalaryn damytýdaǵy tájirıbesi óte qundy. Horvatııada fýtbol óte jaqsy damyǵan. Sizderde myqty jattyqtyrýshylar men oıynshylar bar. Osy turǵyda biz fýtbol komandasyn kúsheıtýge kúsh salamyz. Sonymen qatar, birlesken ınvestıtsııalyq jobalardy júzege asyrýǵa ashyqpyz», - dedi Ó.Shókeev.

Óz kezeginde Refık Shabanovıch eki el arasyndaǵy yntymaqtastyqty nyǵaıtyp, Túrkistan oblysynda júzege asyrýǵa bolatyn birqatar jańa jobalardy atap ótti. Horvatııadaǵy týrızm ekonomıkanyń negizgi draıveri bolyp tabylatynyn jáne olar osy salany damytýdyń tabysty tájirıbesimen bólisýge daıyn ekenin jetkizdi.