Túrkistan halqynyń kólik salyǵyna qaryzy 1 mlrd teńgege jetken
Oblys ákimi Janseıit Túımebaevtyń tóraǵalyǵymen ótken májiliste «kóleńkeli ekonomıkamen» kúresýdiń nátıjeli jumystary sóz boldy. Departament basshysynyń aıtýynsha, aǵymdaǵy jyldyń alǵashqy 6 aıynda memlekettik bıýdjet jospary 103% oryndalyp, naqty 151 mlrd teńge óndirilgen. Oblystyń syrtqy saýda aınalymy 1 mlrd 249 mln AQSh dollaryn qurap, ótken jyldyń osy kezeńimen salystyrǵanda taýar aınalymy 322 mln AQSh dollaryna nemese 35 paıyzǵa ulǵaıǵan. Jergilikti atqarýshy jáne quziretti organdarmen birlese atqarǵan jumystardyń nátıjesinde jyl basynan bıýdjetke qosymsha anyqtalǵan ishki rezervter esebinen jalpy 13,2 mlrd teńge óndirildi.
Sondaı-aq, departament basshysy qosymsha kiris kózderin anyqtaý jumystary júrgizilse, salyq salý bazasyn keńeıtýge múmkindikter bar ekenin naqty dáleldermen aıtyp ótti. Atap aıtqanda, saýda oryndary men saltanat saraılarynyń (toıhanalar) salyqty ýaqtyly ári zańǵa sáıkes tóleýin qadaǵalaǵan jón. Máselen, salyq tóleý boıynsha «Alataý», «Sultan» jáne basqa da saltanat saraılarynan kemshilikter anyqtalyp otyr. Іri demalys oryndary da zańnan attap ótip, nebir qýlyqtarǵa baryp júr. Aýdan, qala aýmaǵynda jergilikti bıýdjet esebinen jańartylǵan nemese jańadan tartylǵan gaz, sý jelileriniń ýaqtyly tıisti sharýashylyq sýbektileriniń balansyna ótkizilmeýinen múlik jáne jer salyqtary joǵalýda. Osy jáne ózge de jumystardy baıandaǵan departament basshysy zańsyzdyqtarmen kúresý baǵytyndaǵy is-sharalar jalǵasatynyn aıtty.
Bul rette oblys ákimi Janseıit Túımebaev salyq jáne bıýdjetke túsetin basqa da tólemderdiń memleket bıýdjetine tolyq jáne ýaqytyly túsýi memleketimizdiń ekonomıkalyq damýynda, qaýipsizdigin qamtamasyz etýde jáne halqymyzdyń áleýmettik jaǵdaıyn jaqsartýda mańyzy joǵary ekenin aıtty. Salyqty ýaqtyly jınaý, «kóleńkeli ekonomıkamen» kúres júrgizý jóninde tıisti ýákiletti jáne atqarýshy organdarǵa naqty tapsyrmalar berdi.
«Túrkistan oblysy bıýdjetiniń 80 paıyzy dotatsııa arqyly keledi. Biz dotatsııany azaıtý maqsatynda salyqty ýaqtyly tóleýimiz kerek. Kásipkerler tabysyn jasyrmaı, salyǵyn zańǵa sáıkes tólep, janashyrlyq tanytýǵa tıis. Mysaly, oblystaǵy 190 qonaq úıden nebári 68 mln teńge salyq tússe, 436 kásipker salyqty jasyryp otyr. Óńir turǵyndarynyń kólik salyǵyna qaryzy 1 mlrd teńgege jetken. Bul - oılanarlyq jaǵdaı. Departament basshysy kóptegen máselerdi atap ótti. Olardyń bárin baqylaýda ustap, jumysty shıratqan jón» , - dedi Janseıit Túımebaev.