Túrkistan dendrosaıabaǵyndaǵy aǵash japyraqtaryn kún sáýlesi kúıdirip jibergen - ǵalym
Áleýmettik jelide taraǵan sýretter men vıdeodan Túrkistan dendrosaıabaǵyna otyrǵyzylǵan aǵashtardyń qýrap jatqandyǵyn kórýge bolady. Qylqan japyraqty aǵashtar sarǵaıyp ketken. Saıabaqtaǵy aǵashtardy arnaıy kórip shyqqan bıologııa ǵylymdarynyń kandıdaty Bahadúr ıÝsýpov japyraqtardy kúnniń kózi kúıdirip jibergendigin aıtty.
«Bıyl qys erekshe boldy. Qystyń sońǵy kúnderinde aǵashtardaǵy sýdyń azaıýyna baılanysty ári kún sáýlesiniń túsýinen japyraqtar kúıip ketken. Ásirese, uzaq jatyp qalǵan qarǵa túsken sáýle shaǵylysyp, aǵashtarǵa qatty áser etken. Aldaǵy ýaqytta kúıgen japyraqtar túsip, ornyna jańasy shyǵady. Bári ornyna keledi. Bul jaǵdaı tek Túrkistan qalasynda ǵana emes, Shymkentte, sondaı-aq kórshi Ózbekstan memleketiniń astanasy Tashkent qalasynda baıqalyp otyr», - dedi Bahadúr ıÝsýpov.
Al, Túrkistan qalasynyń ákimdigi saıabaqtar men alleıalardaǵy aǵashtardy aman alyp qalý maqsatynda barlyq qajetti is-sharalar atqarylyp jatqandyǵyn jetkizdi.
«Túrkistan qalasy ákimdigine qarasty barlyq saıabaqtar, gúlbaqtar men kóshelerdegi aǵashtardyń tamyryna qosymsha qorektik tyńaıtqyshtar erte kóktemde berilgen. Hımııalyq óńdeý jumystary da josparly túrde júrgizilip jatyr. Nátıjesinde kúıikke shaldyqqan aǵashtar qaıta qalpyna kele bastady. Olardy kútip-baptaý men ýaqtyly sýǵarý jumystary Túrkistan qalasynyń dendrolog mamandarynyń qatań baqylaýynda. Qalalyq saıabaqta aǵashtar qýraǵan jaǵdaıda merdiger mekeme kepildik merzimine sáıkes óz esebinen tolyqtaı qalpyna keltiretinin qaperge beremiz», - delingen qalalyq ákimdik tarapynan taratylǵan aqparatta.