Túrkistan aýmaǵynda arheologııalyq qazba jumystary bastaldy

ShYMKENT. QazAqparat - «Túrkistan arheologııalyq ekspedıtsııasy» jobasy aıasynda «Áziret Sultan» memlekettik tarıhı-mádenı qoryq mýzeıi kóne shahardyń mańynan arheologııalyq qazba jumystaryn bastady. Babaıqorǵan aýyldyq okrýginiń Mergen tóbe jerindegi qazba orny Túrkistan qalasynan soltústik-batysqa qaraı 33 shaqyrym jerde, Jańaqorǵan ózeniniń jaǵalaýynda ornalasqan, dep habarlaıdy QazAqparat tilshisi.

Qazba jumystaryna 15-ten asa maman qatysýda. Onyń ishinde «Áziret Sultan» qoryq-mýzeıiniń arheology Baqytjan Nurhanov pen Nurjan Tadjıbaev ta bar. Arheolog mamandardyń aıtýynsha obalar qurylysynyń syrtqy turpatyna qaraǵanda bul eskertkishter óte qundy aqparattar beredi. Atalǵan arheologııalyq qazba jumystary nátıjesinde qazirdiń ózinde ejelgi obalar orny anyqtaldy.

Osy oraıda, arheolog Talǵat Óserov atalǵan obalar erte Temir jáne erte Túrik dáýirlerine qatysty degen boljam jasap otyr. Obalardyń dıametri 23-26 m. bıiktikteri jerdiń deńgeıinen eseptegende 2 - 2,2 m bolady. Qazirgi kezde obalardyń syrtqy qurylystary anyqtala bastady.

Aıta ketsek, bıyl «Ázirt Sultan» qoryq-mýzeıi arheologııalyq qazba zertteý jumystaryn júrgizýge beriletin lıtsenzııaǵa ıe bolǵan. Mýzeı tarıhynda osyndaı arheologııalyq qazba jumystary mýzeı tarapynan alǵash ret júzege asýda.