Túrkistan áýejaıynan oryndalatyn halyqaralyq reıster sany artady

TÚRKІSTAN. QazAqparat - 3 mamyrdan bastap Turkish Airlines áýe kompanııasy túrki áleminiń rýhanı astanasy - Túrkistan qalasynan Ystanbulǵa turaqty jolaýshylar reısin ashýdy josparlap otyr, dep habarlaıdy QazAqparat.

Indýstrııa jáne ınfraqurylymdyq damý mınıstrliginiń málimetinshe, túrik áýe kompanııasy Túrkistan men Ystanbul qalalary arasynda B-737 áýe kemesimen aptasyna 3 turaqty reıs oryndaıdy (seısenbi, beısenbi, senbi kúnderi).

Budan basqa, 17 mamyrdan bastap otandyq loýkost tasymaldaýshy Fly Arystan kompanııasy Túrkistan men Ystanbul arasynda jasalatyn reıs sanyn aptasyna 7-ge deıin (kún saıyn) ulǵaıtpaq.

Osylaısha, bıyl mamyr aıynan bastap eki qala arasynda aptasyna 10 turaqty jolaýshylar reısi oryndalady.

Sonymen qatar, Túrkistannan Bishkekke (Qyrǵyzstan), Tashkentke (Ózbekstan) jáne basqa baǵyttarǵa jańa reıster ashý josparda bar.

Reıster sanıtarlyq-epıdemıologııalyq talaptardy qatań saqtaı otyryp jáne áýe kompanııalarynyń saıtynda jarııalanǵan kestege sáıkes oryndalady.