Túrkistan áýejaıynan 47 myńǵa jýyq jolaýshy tasymaldandy

TÚRKІSTAN. QazAqparat - Túrkistan qalasynyń áýejaıynan alǵashqy turaqty reıs iske qosylǵan sátten bastap (2020 jylǵy 1 jeltoqsan) 160-tan astam reıs oryndalyp, 47 myńǵa jýyq jolaýshy tasymaldandy. Reısterdiń ortasha kommertsııalyq júktemesi 83%-dy qurady. Bul týraly QazAqparat Azamattyq avıatsııa komıtetine silteme jasap habarlaıdy.

Azamattyq avıatsııa komıtetiniń habarlaýynsha, búgingi tańda Túrkistan áýejaıynan Nur-Sultan, Almaty, Atyraý jáne Ystanbulǵa reıster oryndalýda. Osy jyldyń 2-shi jartyjyldyǵynan bastap Túrkistandy aptasyna 50 reıs jıiligimen 10 oblys ortalyǵymen (Aqtaý, Aqtóbe, Qaraǵandy, Kókshetaý, Qostanaı, Pavlodar, Petropavl, Taldyqorǵan, Óskemen) qosý josparlanýda.

Túrkistan qalasynyń áýejaıy sheteldik áýe kompanııalardyń ushýy úshin «ashyq aspan» rejımine engizilgen, bul ony ushý geografııasyn keńeıtý úshin tartymdy etedi jáne sheteldik týrıster aǵynyn tartýǵa yqpal etedi.
Sondaı-aq, aǵymdaǵy jyldyń 31 mamyrynan bastap «Fly Arystan» áýe kompanııasy Túrkistannan Bishkekke (Qyrǵyzstan) jańa reısterdi iske qosýdy josparlap otyr. Sonymen qatar, Tashkentke (Ózbekstan) reıstiń ashylýy qarastyrylýda.
Reıster sanıtarlyq – epıdemıologııalyq talaptardy qatań saqtaı otyryp jáne áýe kompanııa saıtynda jarııalanǵan kestege sáıkes ushyrylady.

Eske salsaq, buǵan deıin Túrkistan áýejaıynan oryndalatyn halyqaralyq reıster sany artqany týraly habarlaǵan bolatynbyz.