Túrkistan áýejaıyn sý basqany jaıly aqparat jalǵan - ákimdik

TÚRKІSTAN. QazAqparat - Jelide Túrkistan qalasyndaǵy áýejaıdy sý basqany týraly aqparat tarady. Muny Túrkistan ákimdiginiń baspasóz qyzmeti teriske shyǵardy, dep habarlaıdy QazAqparat tilshisi.

Áleýmettik jelide «tasqyn sý Túrkistan qalasyndaǵy áýejaıdy da alyp ketti» degen aqparat pen vıdeo júr.

Osyǵan baılanysty qala ákimdigi baspasóz qyzmetiniń mamandary qaladan shyqqan joldan bastap, áýejaıǵa deıingi aralyqty vıdeoǵa túsirip jelige júktedi.

Ol vıdeodan ushaq aılaǵy mańyna sý jınalmaǵanyn kórýge bolady. Tipti, joldyń ózi de tap taza.

Túrkistan halyqaralyq áýejaıy qalypty jumys istep tur.

Eske sala keteıik, óńirdegi Kentaý, Túrkistan qalalarynda jáne Báıdibek, Saýran, Ordabasy aýdandarynda jaýyn-shashynnan kósheler men aýlalardy sý basqanyn habarlaǵan edik.

Tasqyn sý Saýran aýdanyndaǵy eldi mekenderge qaýip tóndirdi. Sý tasqynyna baılanysty Saýranda mektep oqýshylary onlaın oqýǵa kóshti jáne 7 balabaqsha jumysyn toqtatty.

Óńirde kóligimen tasqyn sý ortasynda qalyp qoıǵan turǵyndar qutqaryldy.

4 eldi mekende sý burý jumystary júrgizilip jatyr, turǵyndar úshin «jedel jeli» iske qosyldy.

Oblystyq tótenshe jaǵdaılar departamentiniń bastyǵy Nurǵalı Júnisov Kentaý qalasy men Saýran aýdanynda jergilikti deńgeıde tótenshe jaǵdaı jarııalaýdy usyndy.

ıÝrıı Ilın keshe Túrkistan oblysynda tótenshe jaǵdaı jarııalanýy múmkin ekenin habarlady.