TURKISTAN arnaıy ekonomıka aımaǵynda 408 mlrd teńgeniń jobasy iske asyrylady

TÚRKІSTAN. QazAqparat - Túrkistan oblysynyń ortalyǵynda qurylǵan «TURKISTAN» arnaıy ekonomıkalyq aımaǵynda»​ 20 kompanııa jalpy quny 408 mlrd teńge bolatyn 23 joba iske asyratyn bolady, dep habarlaıdy QazAqparat Óńirlik kommýnıkatsııalar qyzmetine silteme jasap.

Búginge deıin onyń 115 mlrd teńgesi ıgerildi. Nátıjesinde qurylys kezeńinde jumyspen qamtylǵandar sany alty myńǵa jýyqtaıdy.
Olardyń qatarynda áýejaı, neke saraıy, kópbeıindi aýrýhana, saýda-oıyn-saýyq ortalyǵy, qonaq úı, turǵyn úı, sport keshenderi jáne kópfýnktsıonaldy týrıstik kesheni men bıznes ortalyqtary bar.
Budan bólek, óńirde toqtap turǵan ónerkásiptik alańdardyń áleýetin iske qosý úshin arnaıy ekonomıkalyq aımaǵynyń ónerkásiptik aımaǵynyń aýmaǵyna Kentaý qalasyndaǵy burynǵy Ekskavator zaýytynyń 35 gektary da qosyldy. Munda «TURKISTAN» arnaıy ekonomıkalyq aımaǵynyń Basqarýshy kompanııasy «Brownfield» daıyn ǵımarattar bazasynda aýmaqty birlesip ıgerý boıynsha zaýyt quryltaıshylarymen birlesken jobany iske asyrdy. Qazirgi tańda, qujattardy daıyndaý jumystary júrgizilýde. Jalpy quny 2,2 mlrd teńge bolatyn 2 joba qol qoıý satysynda jáne 15 mlrd teńge bolatyn 6 jobamen kelissózder júrgizilýde.​
Aıta keteıik, «TURKISTAN» arnaıy ekonomıkalyq aımaǵy» 2018 jyly qurylǵan bolatyn. Ondaǵy maqsat – Túrkistandy jedel damytý, qalanyń týrıstik áleýetin arttyrý jáne jalpy Túrki áleminiń rýhanı astanasy retinde odan ári qalyptastyrý.
«TURKISTAN» arnaıy ekonomıkalyq aımaǵy 4 sýbaımaqtan turady. Jalpy aýdany 3014 gektardy qurasa, onyń 297-si tarıhı-mádenı ortalyq, 1350-i ákimshilik-iskerlik ortalyq, 400-i óndiristik, 967-si áýejaı aımaǵyna jatady.
«TURKISTAN» arnaıy ekonomıkalyq aımaǵyna keletin áleýetti ınvestorlarǵa qolaıly ınvestıtsııalyq jaǵdaılar jasaý maqsatynda 2043 jylǵa deıin keden salyǵynan, korporatıvtik tabys salyǵynan, jer salyǵynan, múlik salyǵynan, qosymsha qun salyǵynan bosatý jáne óteýsiz negizde jer telimin berý qarastyrylǵan.