Túrkistan ákimi órtengen úıden 3 balany qutqarǵan turǵynǵa alǵys aıtty

TÚRKІSTAN. QazAqparat – Túrkistan qalasynyń ákimi Rashıd Aıýpov órtengen úıden úsh balany alyp shyqqan turǵynǵa alǵys aıtty. Óz ómirin qaterge tigip, balalardy qutqarǵan Ǵazız Nysanqulovty qala ákimi arnaıy qabyldady, dep habarlaıdy QazAqparat tilshisi.

Kishkentaı búldirshinderdi ajaldan arashalap qalǵan beıbit kúnniń batyryna shahar basshysy rızashylyǵyn bildirdi. Bul jóninde ákim jelidegi paraqshasynda da bólisti.

«Maqtan tutar, úlgi alar jerlesimiz – Ǵazız Serikbaıuly. Ótken aptada bir otbasynyń basyna qater tónip, baspanasyn órt jalmap, úı-kúısiz qaldy. Mine sol mezette kórshilerine kómekke kelip, úsh balasyn órtten aman alyp qalǵan Ǵazız Serikbaıulymen búgin tanysyp, qolyn aldym. Osyndaı janashyr da batyl jerlesterimmen maqtanamyn! Aıta keteıin, bul otbasyǵa sol kúni de jolyǵyp, senbi kúni «Asar» eriktiler tobymen baryp qaıttyq. Qoldan kelgenshe qoldaý kórsettik. Áli de asarlatyp úıdi kóterýge kómektesemiz» dedi ákim áleýmettik jelidegi paraqshasynda.

Eske salaıyq, 6 aqpan kúni Túrkistan qalasynyń turǵyny Álimhan Nazarbekovtiń shańyraǵy otqa oranǵan bolatyn. Oqıǵany alǵashqylardyń biri bolyp kórgen kórshisi qyzyl jalynnan qaımyqpaı, úıdiń terezesinen kirgen edi. Sóıtip 2014, 2015, 2017 jyly týǵan búldirshinderdi syrtqa alyp shyǵyp, qutqaryp qaldy.

Búginde baspanasy órtenip ketken otbasynyń jaǵdaıy shahar basshysynyń nazaryna alynyp, kómek kórsetilýde.