Túrkistan ákimi, ardagerler men pedagogtar jastarǵa dáris oqydy

TÚRKІSTAN. QazAqparat - Túrkistanda Tuńǵysh Prezıdent kúnine oraı stýdentterge arnaıy dáris ótti. Halyqaralyq Qazaq-Túrik ýnıversıtetinde ótken shara barysynda Elbasy Nursultan  Nazarbaevtyń memleket aldyndaǵy jetistikteri sóz boldy, dep habarlaıdy QazAqparat  tilshisi.

Lektsııalar bir mezgilde bes sektsııada oqyldy. Onda Ardagerler keńesiniń tóraǵasy Jeńisbek Máýlenqulov, Túrkistan qalasynyń ákimi Rashıd Aıýpov, ýnıversıtettiń ǵalym-ustazdary Seıdýlla Sadyqov, Tálib Jumanov, Rashıd Ibragımovtar Elbasynyń eren eńbekteri men elimizdiń búgingi jetken jetistikterin jastarǵa áńgimelep, qundy derektermen bólisti. Atalmysh merekeniń mańyzy men mánine toqtaldy.

Oblystyq Ardagerler keńesiniń tóraǵasy Jeńisbek Máýlenqulov stýdentterge Tuńǵysh Prezıdentimiz N.Nazarbaevtyń ǵasyrǵa tatyrlyq isteri men Qazaqstannyń mártebesin tórtkúl dúnıege tanytý úshin jasaǵan eren eńbekteri jóninde keńinen baıandady. Keleshekti bilý úshin tarıhymyzdy taný qajettigine nazar aýdardy. Táýelsizdik jyldarynda qoǵamnyń bir formatsııadan ekinshisine ótýi barysyndaǵy Elbasynyń kóregendiliginiń arqasynda mańyzdy sheshimder qabyldaýy utymdy jaǵdaı bolǵandyǵyn aıtyp ótti.  Búginde elimiz damýdyń dańǵyl jolyna túse otyryp, álemniń ozyq 30 eliniń qatarynan oıyp turyp oryn alýǵa umtylǵan edi. Bul belestiń de, odan da zor asýlardyń da baǵyndyrylatyny sózsiz. Oǵan Elbasymyzdyń bastamasymen qabyldanǵan «Qazaqstan-2050» strategııasy, «Nurly jol» baǵdarlamasy, «100 naqty qadam» ult jospary óz septigin tıgizeri anyq. Spıkerler stýdentterdi bilimdi de, tárbıeli bolýǵa shaqyryp, bolashaq jastardyń qolynda ekenin jan-jaqty túsindirdi.

Túrkistan qalasynyń ákimi Rashıd Aıýpov bolsa stýdenttermen kezdesip, Tuńǵysh Prezıdenttiń eldi damytý jolyndaǵy eńbekterimen tanystyrdy.   Túrkistan qalasynyń oblys ortalyǵy bolýynyń mańyzy men aldaǵy atqarylar sharalarda jastardyń úlesin atap ótti. Olardy qalanyń damýyna úles qosýǵa shaqyrdy jáne Jastar jylyna oraı jasalatyn jobalar týraly aqparat berdi.Týrızm salasynynyń damýyna atsalysyp,  meıramhana  jáne qonaqúı júıesin álemdik deńgeıge kóterý maqsatynda jobalaryn usynýdy tapsyrdy. «Ǵylym bar jerde – damý bar» demekshi osy ýnıversıtetpen birigip, oblysqa qajetti kadrlardy daıyndap, kóptegen jobalar jasalý kerektigin atap ótti.

Dárister sońynda stýdentter túrli suraqtar qoıyp, jaýaptar aldy.