Túrkimenstanda temeki satýǵa tyıym salyndy

ASTANA. QazAqparat - Túrkimenstan bıligi temekimen kúres baǵdarlamasy aıasynda birneshe myń qorap temekini jaǵyp jiberdi. Sondaı-aq elde tolyqtaı temeki satýǵa tyıym saldy, dep jazady Bı-Bı-Sı.

Chrono-TM portalynyń málimetine súıensek, temeki satýmen aınalysqandarǵa 1,7 myń dollar aıyppul salynady. Bı-Bı-Sı habarlaǵandaı, Túrkimenstan dúńgirshekterinde shynymen de temeki qalmaǵan. Al Chrono-TM bolsa, bir qorap temeki qara bazarda 12 dollarǵa deıin baratynyn habarlady.

Frans-press jazǵandaı, 5 qańtarda teledıdardan kórsetilgen úkimet otyrysynan keıin dúkender men dúńgirshekterdiń ıeleri temekini tek jaqyn tanystaryna ǵana sata bastaǵan. Otyrys kezinde prezıdent Gýrbangýly Berdymýhammedov deni saý qoǵam jáne qaýipsizdikti qorǵaý memlekettiń qyzmetiniń jumysyn synǵa alyp, temekimen kúresýde talap kúsheıtýge shaqyrǵan bolatyn. Osydan keıin temeki órteý sharasy bastaldy. Sondaı-aq dúkenderde de tekseris júrgizilýde. Prezıdenttiń ózi dáriger-dantıst bolǵan. BAQ-tyń habarlaýynsha, salaýatty ómir saltyn berik ustanǵan.

2011 jyly tabakqa aktsız salyǵy ósirildi, al 2013 jyly qoǵamdyq oryndarda temeki shegýge tyıym salynǵan bolatyn.

Dúnıejúzilik densaýlyq saqtaý uıymynyń málimetterine sáıkes, Túrkimenstan temeki az shegetin elder qatarynda. Sondaı-aq elde temeki baǵasy da anaǵurlym qymbat bolyp keledi.